Tags-Travel

thā safar darpesh jaane kitne 'nūrī' saal kā
kaise kaise fāsle the tere mere darmiyāñ

safar-pasand tabī.at ko ḳhauf-e-sahrā kyā
'sabā' havā kī vahī sīTiyāñ purānī haiñ

ham is liye bhī na.e ham-safar talāsh kareñ
hamāre haath meñ baisākhiyāñ purānī haiñ

musāfiroñ meñ abhī talḳhiyāñ purānī haiñ
safar nayā hai magar kashtiyāñ purānī haiñ

ek ḳhadsha pahle darvāze se apne saath hai
rāstoñ kī dilkashī ḳhū-e-safar le jā.egī

safar to ek sitāra-ġhamīñ thā varna hameñ
kisī savād-e-masarrat meñ jā nikalnā thā

kyuuñ paañv pasāre tū paḌā hai sar-e-rāhe
kyā saḳht safar hai zarā saa.e se idhar dekh

sunā hai sachchī ho nīyat to raah khultī hai
chalo safar na kareñ kam se kam irāda kareñ

vaqt ke qāfile meñ jab koī na ham-safar milā
ban ke ġhubār-e-rahguzar dasht meñ ham bikhar ga.e

tahzīb kā tasallut hai aa.ine se bāhar
tārīḳh ke safar kā vijdān aa.ine meñ

ho chukā sab jo honā thā sūd-o-ziyāñ ab jo socheñ to kyā rah gayā hai yahāñ
aur kuchh fāsle kā ye raḳht-e-safar aur kuchh roz kā naqd-e-jāñ yā aḳhī

chale ho ghar se to kaam ā.eñge saath le lo
vafā kī ḳhushbū vafā kā saaya kaḌe safar meñ

raat kī raat safar hai apnā
ham ko nūr-e-sahar se ḳhatra

qissa-e-ḳhāk to kuchh ḳhaak se aage tak thā
giilī miTTī kā safar chaak se aage tak thā

safar āsāñ nahīñ hai pāniyoñ kā
jo talve aa ga.ī kaa.ī to jaanā

maiñ bhī qisse sunātā safar ke magar
yaad mujh ko bas ik marhala rah gayā

daraḳht saare sameTe hue haiñ shāḳh-e-ḳhulūs
chalo ki pahle safar kā qayām ḳhatm huā

safar gumāñ hai rāsta ḳhayāl hai
chaloge mere saath kyā ḳhayāl hai

kabhī kabhī safar-e-zindagī se ruuTh ke ham
tire ḳhayāl ke saa.e meñ baiTh jaate haiñ