Tags-Travel

ham-safar ho ke kārvāñ lauTā
rahbarī meñ ye rahzanī kaisī

hai koī jo batā.e shab ke musāfiroñ ko
kitnā safar huā hai kitnā safar rahā hai

safar meñ saa.e kī shāyad kahīñ zarūrat ho
ham apne kāñdhe pe dīvār le ke aa.e haiñ

kiije tavāf-e-kūcha-e-jānāñ ko tez-tar
muzmar hai is meñ sair-o-safar raqs kījiye

mirī tamannā hai ab ke tum phir milo to jī bhar ke muskurā.eñ
ki dekhnā hai ye raushnī kā safar bahut der ba.ad jā kar

umr kā baaqī safar karnā hai is shart ke saath
dhuup dekheñ to use saa.e se ta.abīr kareñ

karnā paḌā thā jis ke liye ye safar mujhe
vo mauj-e-shauq chhoḌ ga.ī ret par mujhe

safar meñ ḳhair-o-shar ke ba.ad vo manzil bhī aa.egī
jahāñ 'ḳhurshīd' apnā goshvāra kar ke dekhūñgā

saaya bhī saath le ke na jā kū-e-yār meñ
ham-zād bhī safar meñ kahīñ rūnumā na ho

vo saath thā to manzileñ nazar nazar charāġh thiiñ
qadam qadam safar meñ ab koī bhī lab duā nahīñ

hai usī ke jamāl-e-nazar kā asar zindagī zindagī hai safar hai safar
sāya-e-shāḳh-e-gul shāḳh-e-gul ban gayā ban gayā abr abr-e-ravāñ dosto

naam le us kā safar āġhāz kar
duur rakh dil ko zarā auhām se

vus.at-e-koh-o-dasht ho shahr o nagar kā gasht ho
merā safar hikāyateñ merā adab kahāniyāñ

din Dhal chukā thā aur parinda safar meñ thā
saarā lahū badan kā ravāñ musht-e-par meñ thā

haTā.e kuchh to patthar Thokaroñ ne
huā to saaf kuchh rasta safar kā

yuuñ tirī chaap se tahrīk-e-safar TūTtī hai
jaise palkoñ ke jhapakne se nazar TūTtī hai

kuchh imtiyāz-e-maz.hab-o-millat nahīñ hameñ
ik mo'tabar rafīq-e-safar DhūñDte haiñ ham

kis safar meñ haiñ ki ab tak rāste nādīda haiñ
āsmāñ pe sham.eñ raushan haiñ magar ḳhvābīda haiñ

ravāñ-davāñ hai idhar umr jānib-e-manzil
idhar ye jaam safar meñ rahe to achchhā hai

hotā agar dabīz junūn-e-safar kā rañg
ḳhud hī utarne lagtā rah-e-pur-ḳhatar kā rañg