Tags-Travel

jhurriyāñ chehre kī ye bachpan kī vo ma.asūmiyat
ek lamhe kā safar hai aa.ine ke sāmne

nāzuk haiñ marāhil safar-e-manzil-e-ġham ke
is raah meñ kho jaatī hai āvāz-e-jaras bhī

shab-e-safar thī qabā tīrgī kī pahne hue
kahīñ kahīñ pe koī raushnī kā dhabbā thā

na maiñ zamīñ huuñ na tū āftāb hai phir bhī
tire tavāf kī ḳhātir safar meñ rahtā huuñ

maiñ ki sahrā-e-mohabbat kā musāfir thā 'farāz'
ek jhoñkā thā ki ḳhushbū ke safar par niklā

jab dhuup ke safar meñ mirā ham-safar banā
bargad se bhī ghanā lagā saaya faqīr kā

ye zindagī to safar hai 'sābir' safar meñ jab bhī kisī se milnā
tamām sadme bhulāte rahnā muhāl hogā hisāb rakhnā

ye ham-safar to sabhī ajnabī se lagte haiñ
maiñ jis ke saath chalā thā vo qāfila hai kahāñ

vo sarsabz zamīnoñ tak ham-safar rahā
uḌ na sakā phir mere saath havāoñ meñ

raste meñ tilismāt bichhī jaatī haiñ har dam
ham ḳhū-e-safar sūrat-e-hairāñ nahīñ hote

tanhā tanhā batā kaTe kyuuñ kar
gar safar de to ham-safar denā

ret ke zariye hamārī manzileñ aur un kī ham
pas yahāñ samt-e-safar kā jānñā be-kār hai

vahī hai jaada vahī safar hai vahī hai manzar vahī nazar hai
magar ba-andāz-e-āshnā.ī hamārī vāraftagī na.ī hai

na apnī raah thī koī na koī manzil thī
tabhī to chāhā thā tujh ko hī ham-safar karnā

maiñ apne aap meñ gahrā utar gayā shāyad
mire safar se alag ho ga.ī ravānī mirī

dasht-e-imkān meñ jaarī hai
sarāboñ kā safar

maiñ bhī nādim huuñ ki sab ke saath chal saktā nahīñ
aur sharminda haiñ mere ham-safar apnī jagah

rāhbar badlā to phir se safar āġhāz huā
dasht-e-gum-rāh meñ is taur masāfat hai baḌī

jo shaḳhs akelā hī bojhal safar se aayā thā
kisī ne pūchhā vo luT kar kidhar se aayā thā

kisī ne sabz jazīre pe mujh ko rok liyā
safar ke azm kī naav bhī laḳht laḳht huī