Tags-Travel

vo paiham safar vo havādis ke tūfāñ
vo pairoñ meñ chhāle vo hañstī nigāheñ

bas ab to aglā safar ḳhushkiyoñ kā aatā hai
hamārī raat ke dariyā utarte jaate haiñ

mire chārāgar maiñ huuñ dar-ba-dar maiñ to thak ga.ī hai ajab safar
mirī be-nishāñ sī haiñ manzileñ mujhe rāsta bhī dikhā piyā

maiñ mai-kade kī raah se ho kar nikal gayā
varna safar hayāt kā kaafī tavīl thā

ik aisī masāfat hai ki saa.at bhī kaThin hai
sadiyoñ kā safar aur kahīñ saaya nahīñ koī

justujū kho.e huoñ kī umr bhar karte rahe
chāñd ke hamrāh ham har shab safar karte rahe

ik samundar be-hisī kā ek kashtī aarzū kī
haa.e kitnī muḳhtasar logoñ kī rūdād-e-safar hai

zarūrat hai mujhe bhī ham-safar kī
havā se ik bagūlā māñgne do

baġhair zād-e-safar ham pahuñch ga.e manzil
bhaTakte girte sambhalte qayām karte hue

shāyad ki vo vāqif nahīñ ādāb-e-safar se
paanī meñ jo qadmoñ ke nishāñ DhūñD rahā thā

safar hayāt kā behad hasīn guzregā
anā ko maar ke baisākhiyāñ banāte haiñ

hadd-e-nazar meñ manzil-e-maqsūd hai magar
jā.egā kaun raḳht-e-safar kis ke paas hai

chalūñgā kab talak tanhā safar meñ
mujhe miltā nahīñ hai kārvāñ kyuuñ

uñgliyoñ meñ us badan kā loch hai
rañg-o-ḳhushbū kā safar taazā huā

jaltī bujhtī sī rahguzar jaise
zindagī duur kā safar jaise

kashtī jab ho beach safar meñ ishq samundar sahrā kyā
manzil kī jānib ab dekho chhoḌo bhī tūfānoñ ko

maiñ paañv toḌ ke baiThā rahā kahīñ na gayā
'salīm' manzileñ tai ho ga.iiñ safar ke baġhair

safar kī ye kaisī vus.ateñ haiñ ki rāsta hai na koī manzil
thakan kā ehsās bhī na utre qadam qadam rahguzār māñge

bahut aziiz hai mujh ko masāfatoñ kī thakan
safar ko paañv kī zanjīr kartā rahtā huuñ

ye kārvāñ shanāvar-e-tūfāñ to hai magar
chehroñ pe boltī hai safar kī thakan abhī