Tags-Travel

na dil-o-dimāġh ko hai sukūñ na zamāñ makāñ ko qarār hai
maiñ safar meñ huuñ ki hazar meñ huuñ mirī zindagī safarī rahī

sub.h-e-safar kī raat thī taare the aur havā
saayā sā ek der talak baam par rahā

gard hone ne hī mahmez kiyā merā safar
merā rasta mirī dīvār meñ haa.il aayā

havā ke saath safar kā na hausla thā jise
sabhī ko ḳhauf usī lamha-e-sharar se thā

vo pech-o-ḳham jo alag merī rahguzar se thā
mujhe ḳhabar hai numāyāñ mire safar se thā

yuuñ bhaTaknā dar-ba-dar achchhā nahīñ lagtā mujhe
bin tumhāre ye safar achchhā nahīñ lagtā mujhe

safar kā shauq na manzil kī justujū baaqī
musāfiroñ ke badan meñ nahīñ lahū baaqī

yaad us kī na aa.e kyuuñ 'maz.har'
muddatoñ ham-safar rahe haiñ ham

dhaḌakte dil se na maujoñ kī razm-gah meñ utar
ḳhat-e-safar ko kaf-e-dast-e-āb khol ke dekh

use ḳhayāl thā tashkīl-e-jāda-e-nau kā
kisī ke saath vo āmāda-e-safar na huā

maut jab aa.e to raahī jaan ho
is safar meñ rāhbar kā kaam hai

vo kyā samajh sakegā mire ishq kā maqām
jo ruuh ke safar meñ badan kā sharīk thā

saath terā agar nahīñ hotā
ham se itnā safar nahīñ hotā

ab nahīñ koī zarūrat ham-safar kī
chal paḌā huuñ gardish-e-ayyām le kar

musāfiroñ kī tarah manzileñ safar meñ haiñ
kidhar ko jaa.e koī rahguzar ko kyā dekhe

dhuul se raah aTī ho ga.ī manzil ma.adūm
kyā ḳhabar kyā hai mire azm-e-safar kā maqsūm

do-ghaḌī ke sāthī ko ham-safar samajhte haiñ
kis qadar purāne haiñ ham na.e zamāne meñ

ham to āvāra the paañv meñ safar bāñdh chale
lo nazar ham hī jhukā leñge udhar mat dekho

savād-e-shahr se aġhmāz karnā chāhtā huuñ
ki maiñ apnā safar āġhāz karnā chāhtā huuñ

unhīñ rāstoñ ne jin par kabhī tum the saath mere
mujhe rok rok pūchhā tirā ham-safar kahāñ hai