Tags-Travel

din ḳhatarnāk jazīra sā nazar aane lagā
apnī hī zaat kā kal shab jo safar ham ne kiyā

aage chal kar ye ḳhudā jaane kahāñ rah jaa.eñ
ġhair bhī chal paḌe jab azm-e-safar ham ne kiyā

vo shor thā na sunī apne jism kī āvāz
bulā rahā thā mujhe kab se ham-safar merā

thakan ke saath baḌhā halqa-e-nazar merā
huā na ḳhatm kisī moḌ par safar merā

safar meñ rahne se is ko qarār rahtā hai
ye zaḳhm dil kā hai paañv kā koī chhālā nahīñ

jab safar kī dhuup meñ murjhā ke ham do pal ruke
ek tanhā peḌ thā merī tarah jaltā huā

paḌh ke ḳhat aur bhī māyūs hue vasl se ham
yaar ne bhejā safar se hameñ sauġhāt meñ kyā

paañv resham ke gadīloñ se utarte hī nahīñ
aur har-vaqt haiñ kāñToñ pe safar kī bāteñ

itāb-e-jāñ huī gard-e-safar kisī ke liye
kisī ko abr-e-karam dho gayā hai raste meñ

bahut aziiz the us ko safar ke hañgāme
vo sab ke saath chalā thā magar akelā thā

isī se kar lo andāza safar kā
qarīb aa duur manzil ho ga.ī hai

soch meñ haiñ kuchh paas nahīñ kis tarah adam tak pahuñcheñge
aa ke safar darpesh huā hai fikr hai be-asbābī kī

sunā hai dasht meñ aage bahut tārīk hai rasta
mire raḳht-e-safar meñ chāñd yā ḳhurshīd dhar denā

mirī āvārgī hī mere hone kī alāmat hai
mujhe phir is safar ke ba.ad bhī koī safar denā

rāh-ravoñ ne dasht-e-safar meñ har ummīd sañvārī thī
rañj kī raah pe chalne vāloñ kā har ḳhvāb muzayyan thā

mere safar kī pahlī manzil jaane kab tak aa.egī
haañp rahā hai sadiyoñ purānā būḌhā nañgā rasta bhī

ham ko āġhāz-e-safar mārtā hai
mārtā koī nahīñ Dar mārtā hai

us sitamgar kī haqīqat ham pe zāhir ho ga.ī
ḳhatm ḳhush-fahmī kī manzil kā safar bhī ho gayā

dhuup hai ret hai aur apnā safar hai jaarī
saaya rakhte haiñ na ham log shajar rakhte haiñ

bāl-o-par rakhte nahīñ azm-e-safar rakhte haiñ
shauq-e-parvāz ba-andāz-e-digar rakhte haiñ