Tags-Travel

apnī ḳhvāhish meñ jo bas ga.e haiñ vo dīvār-o-dar chhoḌ deñ
dhuup āñkhoñ meñ chubhne lagī hai to kyā ham safar chhoḌ deñ

thoḌī hai bahut ek masāfat ko ye duniyā
kuchh aur safar kā sar-o-sāmān banāte

gila kyā thā agar sab saath hote
vo bas tanhā safar se Dar rahā thā

ye safar kaisā hai 'mohsin' jitnā baḌhte jā.iye
baḌhtī jaa.eñ utnī hī manzil-ba-manzil dūriyāñ

savār ham hue aise havā ke kāñdhe par
hamārā paañv bhī jaise safar pe baiTh gayā

junūn-e-ishq le aayā hai āḳhir dasht-e-ġhurbat meñ
muqaddar ban ga.ī gard-e-safar āhista āhista

jab ḳhushī kā mausam thā ham-safar thā ik aalam
kāTnī hai ab lekin ġham kī rahguzar tanhā

kamāl-e-shauq-e-safar bhī udhar hī jaatā hai
kisī safar kā musāfir ho ghar hī jaatā hai

TūTnā thā kuchh ajab qahr-e-safar pahle qadam par
muḌ ga.ī thī aañkh hañstā kheltā ghar sāmne thā

maiñ ye samjhā thā ki sargarm-e-safar hai koī taa.ir
jab rukī āñdhī to ik girtā huā par sāmne thā

ham to tanhā chale the magar raah meñ
mil ga.e ham-safar dostī mal ga.ī

koī bhī safar maiñ ne adhūrā nahīñ chhoḌā
chalnā hai to manzil kī qasam le ke chalī huuñ

kyā pūchhte ho mujh se mire zād-e-safar kā
asbāb meñ bas yād-e-sanam le ke chalī huuñ

gard-e-safar ke saath thā vābasta intizār
ab to kahīñ ġhubār bhī baaqī nahīñ rahā

hamīñ haiñ musāfir hamīñ ābla-pā
tamāsha ai gard-e-safar dekhte haiñ

'ġhālib' ne bulandī kā safar mujh ko sikhāyā
'hālī' ne muravvat kā sabaq yaad dilāyā

ham ko ḳhāk-e-rah-e-safar mat jaan
ai zamīñ āsmāñ to ham bhī haiñ

patā batā.egā ab vaqt un kī manzil kā
musāfiroñ ne to rakhte safar sameT liye

kyā pata zanjīr meñ Dhal jaa.e bistar kī shikan
ye safar kā vaqt hai ab jānib-e-bistar na dekh

phir ham-safar kareñ taraf-e-lā-jehat
ne sharq-o-ġharb ho na junūb-o-shumāl ho