Tags-Travel

ravāñ the ham to safar par charāġh-e-hosh liye
magar sabāt-e-jahāñ kār-e-nā-gahāñ niklā

vahī zamīn vahī sar pe āsmāñ niklā
safar ke paar bhī ik dasht-e-rā.egāñ niklā

qayāmat hai ki hove mudda.ī kā ham-safar 'ġhālib'
vo kāfir jo ḳhudā ko bhī na sauñpā jaa.e hai mujh se

terī āñkhoñ pe mirā ḳhvāb-e-safar ḳhatm huā
jaise sāhil pe utar jaa.e safīna mire dost!

mire liye to ye sāneha bhī nayā nahīñ thā
masāfat-e-jāñ kā ham-safar bhī mirā nahīñ thā

mujhe bhī apnā sharīk-e-safar shumār karo
sahar ke bujhte diyo merā intizār karo

kal sāmne manzil thī pīchhe mirī āvāzeñ
chaltā to bichhaḌ jaatā ruktā to safar jaatā

hausla rakkho safar kā ham-raho
mat ye socho kyā luTā kyā rah gayā

ujāle meñ kisī sūrat safar to kaT hī jaatā hai
miyāñ 'rāshid' magar lagtī hai Thokar shaam hote hī

umr bhar chal ke bhī paa.ī nahīñ manzil ham ne
kuchh samajh meñ nahīñ aatā ye safar kaisā hai

garm-e-safar hai garm-e-safar rah muḌ muḌ kar mat pīchhe dekh
ek do manzil saath chalegī paTke hue qadmoñ kī chaap

ābla-pā huuñ aur safar meñ huuñ
par-burīda huuñ aur uḌaan meñ huuñ

takān hai to sambhal jā magar na uuñgh kabhī
safar kī dhuul badan kā ġhubār baaqī rakh

tire qarīb rahūñ yā ki maiñ safar meñ rahūñ
ye aarzū hai tire halqa-e-asar meñ rahūñ

is safar meñ niiñd aisī kho ga.ī
ham na so.e raat thak kar so ga.ī

kyā ḳhabar hai kis kināre is safar kī shaam ho
kashti-e-umr-e-ravāñ meñ bādbāñ koī nahīñ

raḳht-e-safar meñ sab ko barābar kiyā sharīk
taqsīm-e-zād-e-rāh anokhā nahīñ kiyā

nigāh meñ koī manzil na koī samt-e-safar
havā ḳhamosh hai kashtī kā bādbāñ chup hai

safar kī dhuup meñ chehre sunahre kar liye ham ne
vo andeshe the rañg āñkhoñ ke gahre kar liye ham ne

ta.alluq us se agarche mirā ḳharāb rahā
qasam safar kī vahī ek ham-rikāb rahā