Tags-Travel

ye bhī ik shart-e-safar hai ham-safar koī na ho
jis kisī bhī rāste ko tai karūñ tanhā karūñ

tapish ik aur hai din kī harārtoñ ke sivā
safar ik aur hai sūraj tire zavāl ke ba.ad

nikal paḌe jo safar meñ to sochnā kaisā
kahāñ hai dhuup kahāñ sā.ebān chhoḌ na yaar

dil musāfir hai safar shab kā phir is par turra
kūcha-e-zulf meñ hai har jagah nīchā ūñchā

ab us ke shahr pe 'shāhīn' har safar hai tamām
ajiib ham-safarī kā mo.āmla Thahrā

fāsle kuchh qadmoñ meñ sameTe āñkhoñ meñ kuchh dhuup ke phuul
is ke alāva aur na ham ne kuchh sāmān-e-safar māñgā

qaid-e-tanhā.ī se niklā huuñ abhī jān-e-safar
mujh se milnā mujhe zulfoñ meñ chhupā ke ronā

raste lapeT kar sabhī manzil pe laa.e haiñ
kho.e safar hī bāñdh ke sāhil pe laa.e haiñ

umr ke ik daur meñ yaad aa.egā sahrā kā saath
ye safar jo hai haqīqat dāstāñ ho jā.egā

ḳhvāboñ kā guzar dīda-e-bedār se hogā
ḳhushbū kā safar har dar-o-dīvār se hogā

har ham-safar pe ḳhizr kā dhokā huā mujhe
āb-e-baqā kī raah se katrā ke aa gayā

jahāñ se maiñ ne kiyā thā kabhī safar āġhāz
maiñ ḳhaak dhuul huā lauT kar vahīñ aayā

tan-e-tanhā to safar dil pe girāñ guzregā
muntazir huuñ ki mire saath agar aatā hai koī

ek aalam ne kiyā hai safar-e-mulk-e-adam
ham bhī jāveñge agar sū-e-adam kyā hogā

sū-e-adam phire chale jaate haiñ qāfile
sab ham-safar haiñ ziist hai manzil se dil uchāT

hamārī gard-e-safar bhī na ab mile shāyad
'ra.īs' ahl-e-tamannā ke kārvānoñ meñ

vo log mirī tarz-e-safar jāñch rahe haiñ
manzil kī taraf jin ko humaknā bhī na aayā

nahīñ minnat-kash-e-ehsāñ kisī kā rahguzar meñ
maiñ tanhā huuñ safar bhī pā-piyāda kar rahā huuñ

safar bhī ho mayassar vo bhī din qismat dikhā.e
maiñ barsoñ se irāda hī irāda kar rahā huuñ

sahā jaatā nahīñ ab ranj-e-mahrūmī-e-manzil
safar hī tark kar duuñ ye irāda kar rahā huuñ