Tags-Travel

maiñ us ko kho ke bhī us ko pukārtī hī rahī
ki saarā rabt to āvāz ke safar kā thā

jāntī thī kab bhaTaktī hī rahegī dar-ba-dar
ham-safar apnā sahāboñ ko ghaTā karte hue

is galī se us galī tak dauḌtā rahtā huuñ maiñ
raat utnī hī mayassar hai safar utnā hī hai

safar meñ ain mumkin hai maiñ ḳhud ko chhoḌ duuñ lekin
duā.eñ karne vāloñ kā sahārā saath rahtā hai

safar kī hasrateñ niklīñ bahut mirī yārab
magar jo dil meñ the armān vo kahāñ nikle

nahīñ tirī raah rāh-e-mushkil hai rahbar-e-rāh ḳhud tirā dil
tire qadam meñ hai terī manzil tavīl be-shak safar hai pyāre

āḳhirī kos mujhe aaj hī tai karnā hai
aur is lambe safar kā ye kaḌā kos mujhe

jaatī thī koī raah akelī kisī jānib
tanhā thā safar meñ koī saayā use kahnā

aisī naav meñ kyā safar karnā
jis ne dariyā ko dukh sunā liyā hai

manzil hai kaThin kam zād-e-safar ma.alūm nahīñ kyā honā hai
aur lañgDā apāhij hai rahbar ma.alūm nahīñ kyā honā hai

maiñ musāfir huuñ safar qismat hai
mere baare meñ tū sochā mat kar

na pahuñchā saath yārāna-e-safar kī nā-tavānī se
maiñ sar paTkā kiyā ik umr sag-e-saḳht-jānī se

koī to dosh se bār-e-safar utāregā
hazāroñ rāhzan ummīd-vār raah meñ hai

zād-e-safar se kahīñ kaTtī hai raah
dil meñ faqat shauq-e-safar chāhiye

tum ham-safar hue to huī zindagī aziiz
mujh meñ to zindagī kā koī hausla na thā

vo āsmāñ ho ki parchhā.īñ ho ki terā ḳhayāl
koī to hai jo mirā ham-safar sā rahtā hai

kaTegī umr safar jāda-e-āfrīnī meñ
tirī talāsh ne taufīq-e-gumrahī dī hai

safar meñ hotī hai pahchān kaun kaisā hai
ye aarzū thī mire saath tū safar kartā

ab us ke shahr meñ Thahreñ ki kuuch kar jaa.eñ
'farāz' aao sitāre safar ke dekhte haiñ

ham-safar bhī haiñ rahguzar bhī hai
ye musāfir hī kū-ba-kū hai abhī