Tags-Travel

maiñ sun ke jise lauT ga.ī beach safar se
mānūs sadā thī ki vo dhokā thā sadā kā

kisī kī raah kā patthar haTā rahā huuñ abhī
safar ko aur bhī mushkil banā rahā huuñ abhī

sū-e-falak havā.ī safar hai to kyā huā
Dar jā.ūñ māhtāb kī sūrat nahīñ karūñ

us kī āvāz pe bāhar nikal aayā huuñ 'jamāl'
saarā asbāb-e-safar rah gayā ghar par rakkhā

badnām bahut hai rāh-guzar, ḳhāmosh nazar, bechain safar
ab gard jamī hai ā.ankhoñ meñ aur duur talak rusvā.ī hai

ab ahl-e-kārvāñ pe lagātā hai tohmateñ
vo ham-safar jo hiile bahāne meñ rah gayā

na milā dard-āshnā koī
kaT gayā dard kā safar tanhā

tai kiyā is tarah safar tanhā
ek ham ek rahguzar tanhā

bahut thakān badan meñ mire safar kī rahī
magar vo shauq kī manzil ki har nagar kī rahī

bahut sāmān thā ghar meñ bahut sī ne.amateñ bhī thiiñ
musāfir ne magar apnā safar be-raḳht rakkhā thā

safar huā thā jahāñ se jaarī usī jagah par hai lauTnā phir
qadam qadam hādsoñ se laḌnā na ham se hogā ye hausla phir

mashriq se merā rāsta maġhrib kī samt thā
us kā safar junūb kī jānib shumāl se

ab kahāñ vo pahlī sī fursateñ mayassar haiñ
saarā din safar karnā saarī raat ġham karnā

safar kī raat hai 'nāsir' diloñ meñ
ajab ik dard sā Thahrā huā hai

ham safar ke qisse ko ḳhatm kar ke chalte haiñ
rāsta badaltī hai apnī dāstāñ apnā

bahut sī mushkileñ haa.el haiñ raah meñ lekin
tamām umr kiyā hai safar salīqe se

hamārī ik ḳhatā ne ḳhuld se duniyā meñ lā pheñkā
agar dar-pesh duniyā se bhī phir koī safar aayā

safar meñ sochte rahte haiñ chhāñv aa.e kahīñ
ye dhuup saarā samundar hī pī na jaa.e kahīñ

vo ḳhvāb thā yā safar aane vaale mausam kā
marī paḌī thī zamīñ zahr khā rahī thī havā

ye kyā ki ḳhvāhishoñ kā safar ḳhatm hī na ho
ye kyā ki ek moḌ pe Thahrā to maiñ bhī huuñ