Tags-Travel

sab ke hāthoñ pe thā shab-bhar safar-e-jām-e-sharāb
har ḳhat-e-dast banā rah-guzar-e-jām-e-sharāb

umr bhar chal ke bhī paa.ī nahīñ manzil ham ne
kuchh samajh meñ nahīñ aatā ye safar kaisā hai

sahrā ke sañgīn safar meñ āb-rasānī kam na paḌe
saarī āñkheñ bhar kar rakhnā dekho paanī kam na paḌe

samundaroñ ke safar sab kī qismatoñ meñ kahāñ
so ham kināre se girdāb dekh sakte haiñ

zamāna aaj bhī qāsir hai ye samajhne se
safar kī baat huī kyuuñ havā ke lahje meñ

hoñgī to is rah-guzar meñ bhī kamīñ-gāheñ hazār
phir bhī ye bār-e-safar kyuuñ ho mujhe dushvār abhī

safar meñ dhuup to hogī jo chal sako to chalo
sabhī haiñ bhiiḌ meñ tum bhī nikal sako to chalo

pheñk do bār-e-alam kuchh to safar āsāñ ho
bojh laade hue duniyā se guzarnā kaisā

is qadar baḌhne lage haiñ ghar se ghar ke fāsle
dostoñ se shaam ke paidal safar chhīne ga.e

achchhā to ab safar ho kisī aur samt meñ
ye roz-o-shab kā jāgnā sonā bahut huā

bol ai shām-e-safar rañg-e-rihā.ī kyā hai
dil ko ruknā hai ki tāroñ ko Thahar jaanā hai

dil se thī ummīd ḳhvāhish ke safar par saath de
par ye shāhīñ bhī shikasta-par nazar aayā mujhe

mujh se us kā ham-safar banñā bhī kab dekhā gayā
vo bhī apnī raah kā patthar nazar aayā mujhe

samt-e-manzil kā ta.ayyun nahīñ do gaam kī baat
kitne moḌ aa.e haiñ jab tarz-e-safar badlā hai

is kī palkoñ pe sitāroñ kā safar raushan hai
ghup añdhere meñ mujhe raah dikhātī hai ye shaam

tirī āñkhoñ ko tere husn kā dar jaanā thā
ham ne dariyā ko hī dariyā kā safar jaanā thā

chal paḌe dāman jhaTak kar ham ko pīchhe chhoḌ kar
tanhā āġhāz-e-safar par kyuuñ dobāra kar diyā

jab yaar ne raḳht-e-safar bāñdhā kab zabt kā paarā us din thā
har dard ne dil ko sahlāyā kyā haal hamārā us din thā

ham-navā ham-safar mo'atabar rāhbar phir mileñge tujhe tū shurūa kar safar
kho gayā jo guhar aa.egā lauT kar apnī hastī banā tū use bhuul jā

yuuñ to hamāre saath ka.ī log the magar
kāñToñ bharī zamīn pe tanhā safar kiyā