Tags-Travel

ham un se mil ke unhī ke asar meñ rahte haiñ
safar se aa ke bhī jaise safar meñ rahte haiñ

apne se gurezāñ kabhī aġhyār se barham
mānind bagūloñ ke haiñ ab garm-e-safar ham

agar ghar kā ḳhayāl aayā to rasta bhuul jā.eñge
safar meñ dasht ko jaate hue ham yaad rakkheñge

ye safar kis qadar kaThin hai naañ
dā.eroñ meñ hī ghūmnā hai mujhe

maiñ apnī añgusht kāTtā thā ki biich meñ niiñd aa na jaa.e
agarche sab ḳhvāb kā safar thā magar haqīqat meñ aa basā huuñ

bas itnī rasm-o-rāh hai is zindagī ke saath
ik ajnabī safar meñ milā ajnabī ke saath

kitnā āsāñ lag rahā hai mujh ko aage kā safar
chhoḌ aayā pīchhe parchhā.īñ ko Darne ke liye

na ġham karo jo kaḌī dhuup kā safar hai hayāt
jilau meñ apne koī sāya-e-shajar rakkho

ravāñ-davāñ na.ī tahzīb kā safar rakkho
magar nigāh ko manzil se bā-ḳhabar rakkho

ghar baiThe sair hotī hai arz-o-samā kī roz
mahv-e-safar haiñ tab.a kī jaulāniyoñ se ham

vahīñ se luuT ga.ī rāstoñ kī tanhā.ī
jahāñ pe us ne ye jaanā safar meñ ham bhī haiñ

zamīñ ke saath falak ke safar meñ ham bhī haiñ
qafas-nasīb sahī bāl-o-par meñ ham bhī haiñ

ajab tilism-e-safar hai ki shām-e-maqtal tak
pahuñch gayā huuñ maiñ har moḌ par Thahartā huā

laboñ par pyaas ho to aas ke bādal bhare rakhiyo
sarāboñ ke safar meñ is tarah gulshan hare rakhiyo

vo chāñd rahguzar kā sāthī jo thā safar thā mo.ajiza nazar kā
har baar kī nazar se raushan vo mo.ajiza ho ye baat to ġhalat hai

thakan ġhālib hai dam TuuTe hue haiñ
safar jaarī qadam TuuTe hue haiñ

bāb-e-hairat se mujhe izn-e-safar hone ko hai
tahniyat ai dil ki ab dīvār dar hone ko hai

zād-e-safar kī fikr na manzil kā ho ḳhayāl
rāh-e-talab meñ aao talabgār kī tarah

safar ho pātāl kā ki sair-e-falak ho 'sājid'
jahāñ rahūñgā zamīn se rābta rahegā

ham-safaroñ se tark-e-safar ko kahtā huuñ
Dar hai raah meñ aisī bāteñ hone kā