Tags-Travel

ḳhatm ho raat kā tavīl safar
ziina ziina utar ke dekheñge

rāsta koī safar koī masāfat koī
phir ḳharābī kī atā ho mujhe sūrat koī

shab ke safar meñ chāñd sitāre to saath haiñ
kuchh aur mehrbān falak ho to kyā na ho

paa.e na mirī gard-e-safar bhī ye zamāna
raftār bahut hai jo vo mahmez kiye jaa.e

vo jis ke shāne pe haath rakh kar safar kiyā tū ne manziloñ kā
tirī galī se na jaane kyuuñ aaj sar jhukā.e guzar gayā vo

shikasta-pā raah meñ khaḌā huuñ ga.e dinoñ ko bulā rahā huuñ
jo qāfila merā ham-safar thā misāl-e-gard-e-safar gayā vo

Dar ham ko bhī lagtā hai raste ke sannāTe se
lekin ek safar par ai dil ab jaanā to hogā

mire ham-safar ke safar kī samt hī aur thī
kahīñ rāsta koī gum huā to ḳhabar huī

ham ne aap ke ġham ko ham-safar banāyā hai
ya.anī zindagānī ko mo'atabar banāyā hai

maiñ akelā aur safar kī shaam rañgoñ meñ Dhalī
phir ye manzar merī nazroñ se bhī ojhal ho gayā

abhī to azm-e-safar bhī kiyā na thā ham ne
ki jaag uTThā har ik zarra shāh-rāhoñ kā

moḌ aane do abhī sāmne aa jā.egā
kyā hai aapas meñ sharīkān-e-safar kā rishta

ye aur baat ki maujūd apne ghar meñ huuñ
maiñ terī samt magar mustaqil safar meñ huuñ

'ajmal' safar meñ saath rahīñ yuuñ sa.ūbateñ
jaise ki har sazā kā sazā-vār maiñ hī thā

samjhā thā rahnumā.ī karegā mirī magar
sūraj bhī tīrgī meñ sharīk-e-safar na thā

maiñ bhī kahīñ kahīñ rahā ra.anā.iyoñ se duur
tū bhī kahīñ kahīñ pe sharīk-e-safar na thā

ravāñ huuñ maiñ usī jānib jidhar hai vo bastī
mire liye to ye saarā safar malāl kā hai

ye dar ye taaq ye chaukhaT ye ghar malāl kā hai
safar meñ jitnā hai zād-e-safar malāl kā hai

samundar ke safar meñ is tarah āvāz de ham ko
havā.eñ tez hoñ aur kashtiyoñ meñ shaam ho jaa.e

vo manzileñ bhī ḳhvāb haiñ āñkheñ haiñ jin se chuur
haañ ye safar bhī ḳhvāb hai rasta bhī ḳhvāb hai