Tags-Ummeed

kis se kareñ umīd-e-vafā is jahān meñ
is dil ko jin pe naaz thā vo bhī badal ga.e

dhuup kabhī chamkegī is ummīd pe maiñ
barf ke dariyā meñ sadiyoñ se leTā huuñ

ek ummīd-o-bīm ke aalam meñ bastī dam sādhe thī
aur havā ke tevar the paanī kā aur irāda thā

na koī va.ada na koī yaqīñ na koī umiid
magar hameñ to tirā intizār karnā thā

kis pe qaabū jo tujhī pe nahīñ qaabū apnā
kis se ummīd hameñ jab na huā tū apnā

'hirmāñ' ko maut aa.e shab-e-hijr to kahe
kyūñkar guzārtā hai umīd-e-visāl meñ

ai chashm-e-tamannā tirī ummīd bar aa.e
uThtā hai naqāb-e-ruḳh-e-jānāna mubārak

qafas naġhmoñ se guuñj uThtā hai 'yāqūb'
umīd-e-ḳhush-bayāñ hai aur maiñ huuñ

har aadmī se vafā kī umiid mat rakkho
har ik zamīn se sonā nahīñ nikaltā hai

jab lashkar-e-umīd ko ḳhauf-e-shikast thā
tab āsmāñ se aa.ī sadā mutma.in raho

tum vo nahīñ ho jin se vafā kī ummīd hai
tum se mirī murād zamāna hai aur bas

jo zindāñ meñ aziyyat par aziyyat mujh ko detā hai
maiñ us zālim se ummīd-e-rihā.ī kar nahīñ saktā

sitamgar tujh se ummīd-e-karam hogī jinheñ hogī
hameñ to dekhnā ye thā ki tū zālim kahāñ tak hai

ishq meñ qadr-e-ḳhastagī kī ummīd
ai 'jigar' hosh kī davā kījiye

maiñ apnī fāqa-zada sī ummīd par na kyoñ apnī jaan vārūñ
ki in dukhoñ meñ aur aise hāloñ bhī ye palī hai bahut bhalī hai

zarā ye dil kī umiid dekho yaqīn dekho
maiñ aise ma.asūm se ye kah duuñ ḳhudā nahīñ hai

roz galā ghoñTā jaatā hai ḳhvāhish kā
roz na.ī ummīd jagā.ī jaatī hai

jaañ jaa.e par ummīd na jā.egī kabhī
niiñd aañkh meñ ārām na pā.egī kabhī

nādān dil ko us se vafā kī umiid hai
jo bevafā kisī kā abhī tak huā nahīñ

charḳh se kuchh umiid thī hī nahīñ
aarzū maiñ ne koī kī hī nahīñ