Tags-Ummeed

'āzar' ik mauhūm sī hai ummīd abhī
jis ke sahāre ḳhvāb sunahre buntā huuñ

dil gavārā nahīñ kartā hai shikast-e-ummīd
har taġhāful pe navāzish kā gumāñ hotā hai

sahar kī ummīd ab kise hai sahar kī ummīd ho bhī kaise
ki ziist ummīd o nā-ummīdī ke darmiyāñ thak ke so ga.ī hai

ab bāñjh zamīnoñ se ummīd bhī kyā rakhnā
ro.eñ bhī to lā-hāsil bo.eñ bhī to kyā kāTeñ

sub.h tak kaun jiyegā shab-e-tanhā.ī meñ
dil-e-nādāñ tujhe ummīd-e-sahar hai bhī to kyā

zamīñ pe raat bichhī hai idhar shikasta umiid
falak pe chāñd ugā hai udhar udaas udaas

mahshar kī bhī ummīd pe be car jaan dī
kyā e'tibār va.ada-e-be-e'tibār kā

lutf-o-sitam vafā jafā yās-o-umīd qurb-o-bod
ishq kī umr kaT ga.ī chand tavahhumāt meñ

tīrgī ḳhatm karne kī ummīd par
raat bhar hī jalā ik diyā aur maiñ

nafas nafas meñ jalā kar umiid ke dīpak
qadam qadam pe sitāre bichhā.e the maiñ ne

naumīdī-e-talab pe chaḌhā ke talab kā rañg
ummīd-e-dīd-e-dost ko arzāñ kiyā gayā

mujhe mahshar meñ bhī ummīd kam hai daad paane kī
ḳhudā.ī jab butoñ kī hai to kyā hogā ḳhudā merā

bar-sar-e-hijrāñ bhī vābasta hai ummīd-e-visāl
ham sā shahr-e-ārzū meñ ḳhush-gumāñ koī to hai

isī ummīd par shāyad kabhī ḳhushbū koī utre
mirī yādoñ ke āñgan meñ havā.eñ raqs kartī haiñ

gul-ruḳhoñ se to huī qat.a umiid
'mehr' nazzāra-e-gulshan hī sahī

jin ko baaqī hī na ho ummīd kuchh
aise māyūsoñ kī hasrat dekhnā

apnī ummīd thī so bar aa.ī
yaas shakl-e-sarāb baaqī hai

phirte haiñ jharokoñ ke tale shaah
us kū meñ umīd-e-yak-nazar par

sham-e-umīd jis meñ farozāñ na ho sakī
ab us kī bazm-e-nāz meñ vo raat le chaleñ

jis meñ umīd-o-yās fareb-e-nazar rahī
is haft-ḳhvān-e-ġham kī rivāyāt le chaleñ