Tags-Urdu

haa.e urdu ye siyāsat tirī jāgīr ke saath
koī 'ġhālib' kā taraf-dār koī 'mīr' ke saath

merī gañg-o-jaman tahzīb kī duḳhtar hai ye urdu
ise muslim banāne kī ye sāzish aam hai saaqī

kahte haiñ laḳht-e-dil ko vo bāzār-e-husn meñ
saudā ye mere urdu se bāhar lagā.iye

hai ab tak sehr sā chhāyā tirī jādū-navā.ī kā
dil-e-urdu pe ab tak daaġh hai terī judā.ī kā

urdu ko ḳhud ḳhuun bahā kar joḌ rahe haiñ rishte log
'ġhālib'-o-'momin' 'munshī'-o-'mullā' 'chakbast'-o-'sīmāb' ke saath

vo aisī sarzamīñ hai jis meñ ahl-e-dil abhī tak haiñ
jo shaiḳh o barhaman urdu ke haiñ qābil abhī tak haiñ

us ko bhī har vaqt rahtā hai talaffuz kā ḳhayāl
ishq maiñ ne bhī kiyā hai us se urdu kī tarah

samundar phir hilore legā tahzīb-o-tamaddun kā
zarā dekho to 'ājiz' shāmil-e-urdu-zabāñ kar ke

urdu ke janāze kī ye saj-dhaj ho nirālī
saf-basta hoñ marhūma ke sab vāris-o-vālī

hai marsiyāñ-ḳhvāñ qaum haiñ urdu ke bahut kam
kah do ki 'anīs' is kā likheñ marsiya-e-ġham

saaya ho jab urdu ke janāze pe 'valī' kā
hoñ 'mīr-taqī' saath to hamrāh huuñ 'saudā'

urdu kā ġham-e-marg subuk bhī hai garāñ bhī
hai shāmil-e-arbāb-e-azā shāh-e-jahāñ bhī

ham bhī urdu pe naaz karte haiñ
ye hamārī zabān hai pyāre

mā.il-e-parvāz hai is kā adab
manzil-e-parvāz hai urdu zabāñ

sab zabānoñ par chaḌhī hai 'mauj' ye
is liye mumtāz hai urdu zabāñ

ye zabāñ ke saath hai tahzīb bhī
qābil-e-sad-nāz hai urdu zabāñ

is kā dushman dushman-e-amn-o-amāñ
prem kā andāz hai urdu zabāñ

jis meñ sur haiñ muḳhtalif bhāshāoñ ke
vo anokhā saaz hai urdu zabāñ

hindū muslim sikh īsā.ī koī ho
sab kī hī dam-sāz hai urdu zabāñ

nutq kā e.ajāz hai urdu zabāñ
vaqt kī āvāz hai urdu zabāñ