Tags-Virani

bulā rahī hai mujhe apne ghar kī vīrānī
miyān-e-shor-e-salāsil machal rahā huuñ maiñ

hama-tan-gosh hai ye vīrānī
yaar 'hāmid' ḳhitāb kar lenā

hamārī ḳhāna-vīrānī kī dhun kyuuñ bāġhbāñ ko hai
hamāre paas kyā hai chaar tinke haiñ nasheman ke

vo kamra thā ki vīrānī bharā siina thā 'hāris'
vo ik kone meñ baksā thā ki dil rakkhā huā thā

sū-e-dil aa ke ab chashm-e-karam bhī kyā banā legī
shuā-e-mehr se sahrā kī vīrānī nahīñ jaatī

ham ne khulne na diyā be-sar-o-sāmānī ko
kahāñ le jaa.eñ magar shahr kī vīrānī ko

shagufta lafz likkhe jā rahe haiñ
magar lahjoñ meñ vīrānī bahut hai

apne dil meñ hī basā rakkhī hai maiñ ne kā.enāt
koī kah saktā nahīñ ab naqsh-e-vīrānī mujhe

vāpsī par jo lage haiñ mujhe apne jaise
ḳhush huā huuñ dar-o-dīvār kī vīrānī par

naaz kartī hai ḳhāna-vīrānī
aise ḳhāna-ḳharāb haiñ ham log

ai yaas jo tū dil meñ aa.ī sab kuchh huā par kuchh bhī na huā
yaañ ho ga.ī ḳhāna-vīrānī aur terā zarar kuchh bhī na huā

vatan kyā jur.at-e-ahl-e-junūñ se ho gayā ḳhālī
ḳhirad kī quvvat-e-tajdīd-e-vīrānī nahīñ jaatī

chāñdnī rātoñ meñ yāroñ ke baġhair
chāñdnī rātoñ kī vīrānī huuñ maiñ

vīrānī ke bādal chhāne lag ga.e haiñ
panchhī ab us gaañv se jaane lag ga.e haiñ

gulshan gulshan vīrānī hai jañgal jañgal sannāTā
haa.e vo din jab har manzil meñ shorish-e-ġham kā kaal na thā

ik din maiñ ne us ko dekhā
vīrānī ke manzar the ab ḳhushk samundar āñkhoñ meñ

ik tabassum kā bharam ābād hoñToñ par kiye
jī rahe haiñ log apnī apnī vīrānī ke saath

ab kise dil ke dhaḌakne kī sadā.eñ yaad haiñ
ye bhī hañgāma gayā is ghar kī vīrānī ke saath

chaman meñ rah ke bhī kyuuñ dil kī vīrānī nahīñ jaatī
bas itnī baat par logoñ kī hairānī nahīñ jaatī