Tags-Virani

shaam huī to ghar kī har ik shai par aa kar jhapTe
āñgan kī dahlīz pe baiThe vīrānī ke saa.e

jis ko apnā ghar kahā kartā thā maiñ
jis kī vīrānī se dil mānūs thā

fikr-e-vīrāni-e-dil kyā hai abhī
pahle ābād to ho lene de

tum apnā ranj-o-ġham apnī pareshānī mujhe de do
tumheñ ġham kī qasam is dil kī vīrānī mujhe de do

qadam tapte hue sahrāoñ pe rakkhā hai majnūñ ne
tabhī to ishq kī duniyā meñ vīrānī nahīñ hotī

kam na thī sahrā se kuchh bhī ḳhāna-vīrānī mirī
maiñ nikal aayā kahāñ ai vaa.e nādānī mirī

isī raat aur din ke mele meñ tirā haath chhuTe mire hāthoñ se
tire saath tirī tanhā.ī ho mire saath mirī vīrānī ho

jise raunaq tire qadmoñ ne de kar chhīn lī raunaq
vo laakh ābād ho us ghar kī vīrānī nahīñ jaatī

ham bhī vaise na rahe dasht bhī vaisā na rahā
umr ke saath hī Dhalne lagī vīrānī bhī

āseb-zada haiñ dar-o-dīvar-e-shab-o-roz
kis darja mah o saal kī vīrānī huī hai

udhar niklī vo ḳhushbū shahr-e-gul se
idhar maiñ bāġh-e-vīrānī se niklā

na ham vahshat meñ apne ghar se nikle
na sahrā apnī vīrānī se niklā

ek chahkār ne sannāTe kā toḌā pindār
ek nau-barg hañsā dasht kī vīrānī par

mire kamre kī vīrānī se uktā.e parinde
sulagtī dopahar meñ kis taraf jaate parinde

chalte chalte chale aa.e haiñ pareshānī meñ
ḳhvāb to dab chuke is kūche kī vīrānī meñ

ghar meñ ik tasvīr jañgal kī bhī hai
rābta rahtā hai vīrānī ke saath

dil kī ābādī hai 'aḳhtar' dil kī barbādī kā naam
ik ta.alluq hai mirī hastī ko vīrānī ke saath

koī zī-rūh na thā
atrāf meñ vīrānī thī

ghar kī vīrānī badal Daalī hai raunaq meñ 'hasan'
sahn kā peḌ parindoñ ke havāle kar ke

dil kī vīrānī kā kyā mazkūr hai
ye nagar sau martaba luuTā gayā