Tags-Wahshat

vahshat to sañg-o-ḳhisht kī tartīb le ga.ī
ab fikr ye hai dasht kī vus.at bhī le na jaa.e

aise vahshat-nāk manzar mujh meñ aate haiñ nazar
ab nahīñ hotī kisī par koī hairānī mujhe

is athāh khaa.ī se pattharoñ ko vahshat hai
be-ḳhudī kī vus.at se har ḳhudī pe dahshat hai

ġhamoñ par ḳhaak Dāloñ maiñ ki rokūñ josh-e-vahshat ko
taraddud hai karūñ tadbīr miTTī kī ki patthar kī

bachā.ūñ pairahan kyā chārāgar maiñ dast-e-vahshat se
kahīñ aise garebāñ dāman-e-maryam bhī hote haiñ

marne jiine kā kahāñ hosh tire rindoñ ko
pā-e-vahshat bhī ajab naqsh banā detā hai

vahshat-e-shauq muqaddar thī so bachte kab tak
ab to ye sail-e-balā-ḳhez jahāñ le jaa.e

ai kaash vo bāteñ kī hotīñ jo vahshat-e-dil ko kam kartīñ
itnā jo bakā to ai nāseh mujh ko to asar kuchh bhī na huā

misl-e-nashtar haiñ ḳhār-e-sahrā.ī
aur vahshat barhana-pā huuñ maiñ

rahī jo un se tumheñ kudūrat to baḌh ga.ī vahshiyoñ kī vahshat
uḌaa.ī is darja ḳhāk-e-hasrat kamar kamar tak gaḌe hue haiñ

ye ehtiyāt-e-safar kā maqām hai 'nusrat'
yahāñ se vahshat-e-pā-e-ġhazāl raushan hai

vādi-e-vahshat meñ bhī ham-rāh haiñ āh-o-fuġhāñ
apne hamdam saath haiñ ai jaan tanhā kaun hai

jahāñ insāniyat vahshat ke hāthoñ zab.h hotī ho
jahāñ tazlīl hai jiinā vahāñ behtar hai mar jaanā

dil ke ufaq tak ab to haiñ parchhā.iyāñ tirī
le jaa.e ab to dekh ye vahshat kahāñ kahāñ

pattā pattā shāḳh se TuuTe darvāzoñ pe vahshat sī
yaaro prem kathā meñ kis ne dard kī taan milā.ī hai

baḌhī hai yaas se kuchh aisī vahshat-e-ḳhātir
nikāl kar hī rahegī ye ab vatan se mujhe

sab ḳhirad-mand bane phirte the māshā-allāh
bas tire shahr meñ ik sāhib-e-vahshat ham the

dasht-e-vahshat se tere dīvāne
kaise jāh-o-jalāl se guzre

kisī ehsās meñ pahlī sī ab shiddat nahīñ hotī
ki ab to dil ke sannāTe se bhī vahshat nahīñ hotī

ḳhatm huā hai 'ishqī' tum par silsila-e-vahshat-zadagāñ
shāyad koī shaḳhs tumhāre ba.ad vafā kā naam na le