Tags-Wahshat

vahshat se insāñ meñ shiddat baḌhtī hai
aahū meñ kastūrī paidā hotī hai

yahī dhun thī kahīñ merā dil-e-gum-gashta mil jaa.e
isī vahshat meñ barsoñ ḳhaak chhānī kū-e-jānāñ kī

lachak ke TuuT na jaa.e kahīñ ye shāḳh-e-badan
chale jo tez to vahshat havā se hotī hai

kabhī to justujū us kī kabhī gum aap ho jaanā
mirī vahshat mirā saudā abhī kuchh hai abhī kuchh hai

kyā mirī betābī-e-dil bā.is-e-vahshat nahīñ
ye ḳhalish pahlū kī mere monis-e-ġhurbat nahīñ

hisār-e-dasht-e-vahshat meñ bagūloñ ke ishāroñ par
hathelī par liye phirtī hai muddat se havā āñkheñ

hikmat-e-ahl-e-madrasa kā ġhurūr
merī vahshat se dab ke haar gayā

ab tū ne bhī apnāne se inkār kiyā hai
a vahshat-e-shab tere azā-dār the ham log

logo mirī gul-kāri-e-vahshat kā sila kyā
dīvāne ko ik harf-e-dil-āvez bahut hai

jo aadmī hai talāsh-e-sakūñ meñ sadiyoñ se
usī ne kar dī yahāñ intihā bhī vahshat kī

ye ahl-e-vahshat kā hausla hai ḳhizāñ pe qabza hai fasl-e-gul kā
vo baḌh ke sīna-sipar hue haiñ gumān-e-barq-o-sharar se pahle

havā-e-vahshat dil le uḌī kahāñ se kahāñ
paḌī hai duur zamīñ gard-e-kārvāñ kī tarah

tabassum kar tamāshā dekh ke vahshat kā phir zālim
mirā chāk-e-garebāñ zaḳhm-e-dāman-dār ban jaa.e

āñkhoñ se Tapaktī hai vahī vahshat-e-sahrā
kāñdhe bhī batāte haiñ baḌā baar paḌā hai

dil meñ vahshat jo nahīñ dasht-navardī kaisī
be-ḳhudī chhoḌ ke ab hosh meñ aayā jaa.e

har pal vahī vahshat hai vahī raqs-e-sitam-nāk
kis lamha yahāñ fitna-e-mahshar nahīñ hotā

raushnī kā saath mahñgā paḌ gayā hai
jaane kis vahshat meñ saaya paḌ gayā hai

jo nāloñ kī kabhī vahshat ne Thānī
pukārā zabt bas ḳhāmosh ḳhāmosh

vahshat hai bahut ḳhuun meñ 'nusrat' isī Dar se
sahrā kī taraf jā ke Tahalne kī nahīñ huuñ

vasl kā gul na sahī hijr kā kāñTā hī sahī
kuchh na kuchh to mirī vahshat kā sila de mujh ko