Tags-Wahshat

qaidī rahe vahshat meñ be-ḳhud the magar aise
ye bhī na khulā ham par zindāñ kise kahte haiñ

salāmat hai koī ḳhvāhish na koī yaad zinda
batā ai shaam vahshat ke sivā kyā rah gayā hai

mujh ko tire ḳhayāl se vahshat kabhī na thī
is darja be-adab ye tabī.at kabhī na thī

shā.eroñ meñ guftugū aa.ī kudūrat kī baham
saaf kahtā huuñ ki ab rañg-e-suḳhan mailā huā

dast-e-junūñ-o-panja-e-vahshat chihār-samt
be-barg-o-bār hone lagī hai bahār phir

ham bhī dīvāne haiñ vahshat meñ nikal jā.eñge
najd ik dasht hai kuchh qais kī jāgīr nahīñ

yahī sūrat to har-sū kūcha-o-bāzār meñ bhī hai
jahāñ vahshat barastī ho vahīñ sahrā nahīñ hotā

azm-e-rāsiḳh hai to har gaam hai manzil ba-kanār
vahshat-āsār sivā darra-e-dushvār sahī

aañkh lag jaa.e to vahshat kam ho
chāñd kis vaqt na jaane nikle

ye qaaf se qaaf tak hai shohrat kareñge vo imtihān-e-vahshat
junūñ kā aalam ye kah rahā hai yahīñ se Takrāte sar ko chaliye

tujhe kahtā huuñ sun o vahshat-e-dil
vahāñ le chal jahāñ vo dil-sitāñ hai

vahshat o nā-āshnā.ī mastī o begānagī
yā tirī āñkhoñ meñ dekhī yā tire dīvāna meñ

shahr ke zindāñ ne pahnā diiñ vo zanjīreñ mujhe
merī vahshat ko mayassar dil kā sahrā bhī nahīñ

pesh-e-chashm-e-junūñ faroshinda
dil-e-vahshat-nazhād rah jaa.e

haañ junūñ-ḳhezī-e-dil rehn-e-masarrat na huī
ḳhush huī vahshat-e-ġham jab rasan-o-dār mile

vahshat meñ kyuuñ kisī ke garebāñ ko dekhtā
mere liye to apnā garebān thā bahut

vahī qissa mire dil kā
dil-e-vahshat-zada par bādaloñ kī tarah us umḌe hue be-nām mausam kā

āñkheñ tirī har ek se miltī haiñ be-hijāb
in āhuoñ meñ ab koī vahshat nahīñ rahī

har december isī vahshat meñ guzārā ki kahīñ
phir se āñkhoñ meñ tire ḳhvāb na aane lag jaa.eñ

shahroñ ke makīnoñ se milī jab hameñ vahshat kī zamānat
ham sī ke garebānoñ ko sahrāoñ se aage nikal aa.e