Tags-Wahshat

najd kā sahrā ajab sahrā-e-vahshat-ḳhez hai
qais kyā lailā ko bhī ārām manzil meñ nahīñ

ai 'qalaq' kyuuñ ki chhoḌ duuñ vahshat
vaz.a meñ apnī mustaqil huuñ maiñ

dasht meñ pahuñche to tanhā.ī mukammal ho ga.ī
baḌh ga.ī vahshat to phir ḳhud se hī Takrāne lage

vīrāna-e-ḳhayāl kī vahshat na kam huī
hālāñki baat baat pe ham muskurā.e haiñ

dahshat-zada zamīñ par vahshat bhare makāñ ye
is shahr-e-be-amāñ kā āḳhir koī ḳhudā hai

apnī vahshat se hai shikva dūsre se kyā gila
ham se jab baiThā na jaa.e kū-e-jānāñ kyā kare

dasht-e-vahshat meñ charāġhoñ ko jalā.ūñ kaise
in charāġhoñ se havāoñ ko pareshānī hai

agar vahshat kā ye aalam rahā to ain-mumkin hai
sukūñ se jiite jiite bhī pareshānī se mar jaa.eñ

pattā pattā shāḳh se TuuTe darvāzoñ pe vahshat sī
yaaro prem kathā meñ kis ne dard kī taan milā.ī hai

ḳhaak meñ uñglī pherte rahnā naqsh banānā vahshat likhnā
in vaqtoñ ke chand nishāñ ab bhī kūzoñ par aa jaate haiñ

go ek ġhubār meñ haiñ donoñ
vahshat hai judā judā hamārī

vahshat-tarāz thī kashish-e-shām-e-be-kasī
marqad se apne duur charāġh-e-mazār thā

maiñ ne is se to baḌe kaam liye
aap ko khel se vahshat hī sahī

na ab vo shiddat-e-āvārgī na vahshat-e-dil
hamāre naam kī kuchh aur shohrateñ bhī ga.iiñ

jo pūchhā qais se lailā ne jañgal meñ akele ho
to bole ai nahīñ vahshat hai aur āh-o-fuġhāñ aur ham

bas use chūmte hī chhoḌ diyā
pattharoñ se mujhe to vahshat thī

vasl thā qurb thā qarābat thī
dil ko phir bhī ajiib vahshat thī