Tags-Wahshat

mere zaḳhm-e-jigar ko vahshat meñ
hājat baḳhiya-gar nahīñ hotī

ajal ik ālam-e-vahshat meñ raqsāñ
sabhī ko baarī baarī DhūñDhtī hai

dast-e-junūñ se vo bhī na vahshat meñ bach sakā
parda jo kuchh rahā thā garebāñ ke sāmne

maiñ dhāḌeñ maar kar jo hañs rahī huuñ
mirī vahshat bhī us ko khal rahī hai

bātoñ se sivā hotī hai kuchh vahshat-e-dil aur
ahbāb pareshāñ haiñ mire tarz-e-amal se

fasl-e-gul aate hī vahshat ho ga.ī
phir vahī apnī tabī.at ho ga.ī

vasl kā gul na sahī hijr kā kāñTā hī sahī
kuchh na kuchh to mirī vahshat kā sila de mujh ko

kise batā.ūñ ki vahshat kā fā.eda kyā hai
havā meñ phuul khilāne kā qā.eda kyā hai

muñh zard hai tinke chun rahā huuñ
ai vahshat kyā maiñ kahrubā huuñ

majnūñ ko abas dāva-e-vahsaht hai mujhī se
jis din ki junūñ mujh ko huā thā vo kahāñ thā

aaj kyuuñ pahlī sī kuchh vahshat-e-dil koī nahīñ
aaj maddham hai shab-e-ġham tirā āġhāz bahut

ye kyā vahshat hai ai dīvāne pesh-az-marg vāvailā
rakkhī be-jā binā-e-ḳhāna-e-zanjīr-e-shevan par

adab na vādī-e-vahshat ke mujh se tark hue
junūñ meñ hosh rahā hai barhana-pā.ī kā

taskīn sī kyuuñ mil jaatī hai mizrāb-e-dast-e-shauq mujhe
har tār-e-garebāñ kyā vahshat ke saaz kā hāmil hotā hai

tirī vahshat samajhtā huuñ ai merī aarzū lekin
tujhe kuchh din abhī is dil kī vīrānī meñ rahnā hai

un se kyā kiije tavaqqo.a vo haiñ nau-vārid-e-dasht
dasht-e-vahshat ke jo ādāb se nā-vāqif haiñ

nahīñ koī rāzdār ham sā kiyā na vahshat meñ tujh ko rusvā
ki daaġh mānind-e-ḳhār-e-māhī badan meñ rakhe chhupā chhupā kar

is junūñ kā chāragar ab aur hī kuchh kar ilaaj
aur vahshat baḌh chalī hai kunj-e-zindāñ dekh kar

sab ko vahshat hai mirī vahshat ke sāmāñ dekh kar
chāk-dāmāñ dekh kar chāk-e-garebāñ dekh kar

karte ho pasand vahshat-e-dil
le jāoge kyā hiran kisī kā