Tags-Wahshat

har anjuman meñ dāva-e-vahsaht kiyā karo
kuḌhtā ho jī to logoñ se nafrat kiyā karo

khol degā dasht-e-vahshat uqda-e-tadīr ko
toḌ kar pahuñchūñgā maiñ punjab kī zanjīr ko

maiñ jahāñ paañv rakhūñ vaañ se bagūlā uTThe
reg-e-sahrā mirī vahshat ke barābar ho jā

kuchh is liye bhī mire ghar se us ko thī vahshat
yahāñ bhī apne hī pyāre talāsh kartī thī

badan merā hai ik vīrāñ makāñ, par
makīñ ban kar ye vahshat rah rahī hai

jis ko dekho fikr-e-rafū hai jis ko dekho vo nāseh
bastī vāloñ meñ haar aa.e vahshat kī sauġhāt kahāñ

be-his dīvāroñ kā jañgal kaafī hai vahshat ke liye
ab kyuuñ ham sahrā ko jaa.eñ ab vaise hālāt kahāñ

nargisī chashm dikhā kar ke vo vahshat-zada yaar
ye gayā vo gayā jis tarah ġhazāl aap se aap

bādiya-gardī ābla-pā.ī qismat thī dīvānoñ kī
kis baa.is ai vahshat-e-dil phir vīrāne badnām hue

vahshat-e-dil tujhe le kar maiñ kahāñ jā.ūñ batā
rahte rahte to ye vīrāna bhī ghar hone ko hai

chain kab aatā hai ghar meñ tire dīvāne ko
phir liye jaatī hai vahshat mujhe vīrāne ko

vahshat-e-dil koī shahroñ meñ samā saktī hai
kaash le jaa.e junūñ sū-e-bayābāñ mujh ko

josh-e-vahshat meñ ho kyā ham ko bhalā shukr-e-libās
bas kifāyat hai junūñ dāman-e-sahrā ham ko

merī vahshat ne nikāle jab se paañv
ek sahrā sahn ke andar khulā

havā meñ āj-kal ik dhīmī dhīmī vahshat hai
isī zamāne se shāyad hai ibtidā-e-bahār

merī hī rūdād-e-vahshat sun ke fariyādī haiñ sab
chaak mere hī jigar kā dāman-e-mahshar meñ hai

sardī kī aamad thī lekin sāvan kī rut lauT aa.ī
bujhte bujhte ik vahshat meñ aañkh ne rañj dobāra kiyā

ik garmī-e-jast-e-farāsat hai ik vahshat-e-pā-e-mohabbat hai
jis paañv kī tāqat jī meñ ho vo saath mire do-gām chale

ai shahr-e-ḳhirad kī taaza havā vahshat kā koī in.aam chale
kuchh harf-e-malāmat aur chaleñ kuchh vird-e-zabāñ dushnām chale

ham se vahshat kī na le o majnūñ
ham ne bhī ḳhaak bahut chhānī hai