Tags-Wahshat

bhiiḌ meñ DhūñDeñ kahāñ qais ko ab
vo jo pahchān thī vahshat na rahī

vahshat bhī fusūn-e-mushtarak hai
dil ho ki dimāġh jal rahā hai

vahshat hamāre zabt kā ujḌā mazār hai
lākhoñ jatan kiye na sarāsīmgī ga.ī

is qadar tañg nahīñ vus.at-e-sahrā-e-jahāñ
ham to ik aur hī vahshat meñ mile haiñ tujh se

jahān-e-tañg o hujūm-e-vahshat ġharaz ki dam par burī banī thī
kahāñ maiñ jaatā na jī Thahartā kahīñ jo dasht-e-adam na hotā

vahshat hai ishq-e-parda-nashīñ meñ dam-e-bukā
muñh Dhāñkte haiñ parda-e-chashm-e-parī se ham

uThā.egī jo ham ko vahshat-e-dil yaar ke dar se
gireñge pā.ezī paañv pe apne beḌiyāñ ho kar

namāz-e-asr nahīñ paḌh sakī mirī vahshat
junūn-e-ishq ko maidān-e-karbalā to milā

chāhūñ ki haal vahshat-e-dil kuchh raqam karūñ
bhāgeñ hurūf vaqt-e-nigārish qalam se duur

pesh-ḳhema hai kisī aur na.ī vahshat kā
ye jo itrā ke abhī bād-e-sabā chaltī hai

haiñ lākhoñ rog zamāne meñ kyuuñ ishq hai rusvā be-chārā
haiñ aur bhī vaj.heñ vahshat kī insān ko rakhtīñ dukhiyārā

Thahre hue haiñ ashk havāoñ kī aañkh meñ
mausam ko ab ke vahshat-e-bebāk chāhiye

jazb-e-vahshat tire qurbān tirā kyā kahnā
khiñch ke rag rag meñ mire nashtar-e-fassād aayā

josh-e-vahshat meñ zamīñ par paañv paḌhne kā nahīñ
le uḌegī nik.hat-e-gul kī pareshānī mujhe

isī kā naam hai vahshat-sarā-e-jāñ meñ charāġh
usī ke lams meñ dhaḌkan dil-e-figār kī hai

kaise huā aur kab ye huā kuchh ḳhabar nahīñ thī dil ko to
ek mohabbat jā soī thī vahshat meñ vīrānī meñ

jo kuchh bhī ye jahāñ kī zamāne kī ghar kī hai
rūdād ek lamha-e-vahshat-asar kī hai

mere pīchhe mirī vahshat bhāgī
maiñ jo dīvār girā kar niklā

vahshat-navāz ab vo nazāre nahīñ rahe
nazreñ badal ga.iiñ ki bayābāñ badal gayā

kamāl kar ke dikhāyā hai merī āñkhoñ ne
ab in meñ pahlī sī vahshat rahī rahī na rahī