Tags-Wahshat

utar jaane de vahshat mere sar se habs-e-ḳhalvat kī
maiñ bit-tadrīj phir mānūs-e-mahfil ho hī jā.ūñgā

hosh vaale merī vahshat ko bhalā kyā samjheñ
un ke dīvānoñ ko aalam kī ḳhabar hotī hai

dasht kī āvārgī ho chāk-dāmānī bhī ho
ishq hai dil meñ to vahshat kī farāvānī bhī ho

dasht-e-vahshat ne phir pukārā hai
zindagī aaj tū gavārā hai

dikhānī thī na tumheñ chashm-e-surmagīñ apnī
nigāh-e-nāz se vahshat-zada ġhazāl huā

ik aziyyat hai kār-e-vahshat hai
ai ḳhudā kyā yahī mohabbat hai

ḳhabar-dār ai mirī vahshat ḳhabar-dār
koī laġhzish na ho dīvāngī meñ

vahshat-e-be-rabti-e-pech-o-ḳham-e-hastī na pūchh
nañg-e-bālīdan haiñ juuñ mū-e-sar-e-dīvāna ham

vasl ne mere tashaḳhḳhus ko sambhāle rakkhā
hijr-o-vahshat se kabhī pūchh zarā kaun huuñ maiñ

dil pe kyā mauj-e-'nasīmī' ne mire bosa dharā-
dil kī vahshat pe takallum ne mire qabza kiyā

taaki dariyāoñ kī vahshat rahe haavī sab par
Duub jaatā huuñ maiñ dariyā ke kināre sāhab

kyā ab ishq meñ vaisī vahshat mumkin hai
jaise pāgal ishq meñ pahlī baar the ham

vahshat-zada dil to juuñ sharar hai
is ke ta.iiñ aap se safar hai

ye hai mājrā-e-vahshat ki milā surāġh-e-mahmil
na ġhubār-e-kārvāñ se na darā-e-kārvāñ se

dasht-e-vahshat kā ilāqa mujhe imsāl huā
dāġh-e-sauda sifat-e-nayyar-e-iqbāl huā

chaak ho parda-e-vahshat mujhe manzūr nahīñ
varna ye haath girebān se kuchh duur nahīñ

kuchh duniyā bhī bezār hai ab ham jaise vahshat vāloñ se
kuchh apnā dil bhī duniyā kī is mahfil meñ ghabrā.e hai

hañgāme se vahshat hotī hai tanhā.ī meñ jī ghabrā.e hai
kyā jāniye kyā kuchh hotā hai jab yaad kisī kī aa.e hai

dahshat-zada zamīñ par vahshat bhare makāñ ye
is shahr-e-be-amāñ kā āḳhir koī ḳhudā hai

kalkatta meñ har dam hai 'munīr' aap ko vahshat
har koThī meñ har bañgle meñ jañglā nazar aayā