Tags-Wajood

hai mujh se vujūd-e-hast-o-adam yuuñ hast-o-adam haiñ lā ya.anī
ye ziist kā sāmāñ kuchh bhī nahīñ ye umr-e-gurezāñ kuchh bhī nahīñ

mire vajūd meñ ik karb ban ke bikhrā hai
ye merā dil ki huā bā.is-e-vabāl mujhe

vajūd us kā dhartī se chimTā rahā
dhyān us kā ūñchī uḌānoñ meñ thā

maiñ vo sarv-e-bāġh-e-vajūd huuñ maiñ vo gul huuñ sham-e-hayāt kā
jise fasl-e-gul kī ḳhushī nahīñ jise rañj-e-bād-e-ḳhizāñ nahīñ

hai ḳhasāra hī ḳhasāra saarī hastī sab vajūd
maiñ bhī shāmil huuñ usī meñ aur harjāne meñ huuñ

kashīd karte hue rāhat-e-vajūd-o-adam
diye ke saath rahūñgā na maiñ havā ke saath

duur tak bikhrā huā ret kī sūrat hai vajūd
ḳhud ko āvāz idhar de ki udhar de koī

ḳhud se nibāh shaaq huā hai kabhī kabhī
saarā vajūd chaaq huā hai kabhī kabhī

maiñ terī āñkhoñ kī ye pyaas kis tarah dekhūñ
mire vajūd meñ bādal koī garajtā hai

sadiyoñ kī maiñ kashīd huuñ ai sāqī-e-azal
mere vajūd ko bhī kabhī sarf-e-jām kar

apne vajūd se pare ab
koī bhī rāsta nahīñ hai

ye chaman bahisht ke the ki maañ kā vajūd thā
ye duā kā haath mahak uThā thā ki phuul thā

bajā ki tujh sā rafūgar na mil sakā lekin
ye taar taar vajūd ek din to siinā thā

mire vajūd se harakat to hai zamāne meñ
agarche mauj kī sūrat nahīñ qarār mujhe

maiñ kaun huuñ ki hai sab kāñch kā vajūd mirā
mirā libās bhī mailā dikhā.ī detā hai

mirā vajūd-o-adam raaz hai hamesha se
vahāñ vahāñ bhī nahīñ huuñ jahāñ jahāñ huuñ maiñ

din ke hañgāme meñ gum ho jā.egā merā vajūd
aa.ine meñ mujh sā koī dūsrā rah jā.egā

maiñ ḳhud se laḌne kī rut meñ tumhārā sāthī huuñ
mujhe vajūd meñ ugne de Dhaal hone de

hai aur nahīñ kā ā.īna mujh ko thamā diyā gayā
ya.anī mire vajūd ko khel banā diyā gayā

tujh bin ye mirā vajūd kyā hai
ik peḌ hai aur khokhlā hai