Tags-Wajood

mujh pe khultā hī nahīñ merā sitam-dīda vajūd
koī patthar huuñ ki gum-karda sadā huuñ kyā huuñ

ham ko pahchān ki ai bazm-e-chaman-zār-e-vajūd
ham na hote to tujhe kis ne sañvārā hotā

mire qarīb rahā phir bhī mujh ko paḌh na sakā
mirā vajūd to mahfūz ik kitāb meñ thā

vajūd apnā hai aur aap tai kareñge ham
kahāñ pe honā hai ham ko kahāñ nahīñ honā

bujh kar vajūd-e-sho.ala sulagtā hai kis liye
maiñ raakh huuñ to mujh ko bikhar jaanā chāhiye

shaffāf o saaf, aur latāfat meñ be-misāl
saarā vajūd ā.īna sā hai, ye ishq hai

mire vajūd ke ḳhushbū-nigār sahrā meñ
vo mil ga.e haiñ to mil kar bichhaḌ bhī sakte haiñ

mirā vajūd sarāpā javāb hai kis kā
nahīñ savāl to phir ye savāl sā kyā hai

mire vajūd kā mehvar chamaktā rahtā hai
isī sanad se muqaddar chamaktā rahtā hai

agar vajūd meñ aa kar use na milnā thā
hameñ kyuuñ bhej ke is dahr meñ ḳharāb kiyā

azal ke din se 'mubārak' havāoñ kī zad par
mirā vajūd diye kī misāl rakkhā hai

jalte ākāsh kī Dhalvān pe sūraj kā vajūd
ik pighaltā huā laavā hai ki bujhtā hī nahīñ

hazār shor sameTe hue hai merā vajūd
mire vajūd ke sahrā ko chashm-e-dariyā likh

kaisī kaisī ḳhvāhisheñ is dil meñ paatī haiñ vajūd
ho añgeThī tum bhī ho aur raat barfānī bhī ho

maiñ un kī rah se guzartā na thā magar phir bhī
mirā vajūd mire dushmanoñ pe bhārī thā

mire vajūd meñ kāñToñ kā ek jañgal hai
vo apnī zaat ke phūloñ meñ kyuuñ samāne de

mire vajūd meñ zinda sadī kā sannāTā
tah-e-zamīñ huuñ koī boltā sā dariyā maiñ

vajūd kyuuñ hai shuhūd kyuuñ hai sabāt kyā hai najāt kyā hai
inhī savāloñ kī aag le kar ham apnā isbāt kar rahe haiñ

vo ik vajūd jo paale hue thā sāñpoñ ko
nazar kī zad meñ jo aayā to bāñsurī sā lagā

Dhāñpā kafan ne dāġh-e-uyūb-e-barahnagī
maiñ varna har libās meñ nañg-e-vajūd thā