Tags-Wajood

partav hai terī zaat kā har lamha-e-vajūd
ham ne ye faisla tirī āyāt par kiyā

aa.ina huuñ tire vajūd kā maiñ
aa kabhī dekh rū-ba-rū ho kar

vajūd ke jo hisse
vajūd kī talāsh meñ kho jaate haiñ

ik ḳhvāb kī talāsh meñ niklā huā vajūd
shāyad pahuñch chukā hai kisī dāstān meñ

aage nikal chuke the ham apne vajūd se
phir bhī huī na kam tirī raftār zindagī

vajūd-e-ishq kī tārīḳh kā pata to chale
varaq ulaT ke tū arz o samā ke dekh zarā

ik merā vajūd sun rahā hai
ilhām jo raat kī havā de

āhañg-e-vajūd ban ke har dam
ik mauj-e-digar rahī hai dil meñ

dil dhaḌkanoñ meñ jaise dhaḌaktā usī kā thā
jaise mire vajūd pe chehra usī kā thā

kisī ḳhayāl kā koī vajūd ho shāyad
badal rahā huuñ maiñ ḳhvāboñ ko tajraba kar ke

ham ek fikr ke paikar haiñ ik ḳhayāl ke phuul
tirā vajūd nahīñ hai to merā saayā nahīñ

tire vajūd pe añgḌā.ī ban ke TuuTā hai
vo naġhma jo kisī mutrib ne gungunāyā nahīñ

sar-chashma-e-vajūd ko hargiz na chheḌūñ maiñ
koyal se ik irāda-e-tevar luuñ aur gā.ūñ

charāġh jaltā rahegā hamesha ulfat kā
yahī vajūd ke anvār kā ishāra hai

maiñ jā rahā huuñ mukammal vajūd paane ko
mujhe bhī sūrat-e-imkāñ ne ab pukārā hai

vajūd ke chahār samt regzār thā
kahīñ bhī ḳhvāhishoñ ke biij bo na paa.e ham

vajūd us kā thā ā.īna-e-tilismātī
vo aks jis ne kiyā raaz faash kaisā hai

ye kis ke saa.e ne rafta rafta ik aks mauhūm kar diyā hai
adam agar hai vajūd merā to roz o shab kyuuñ azaab dekhūñ

siyāh chādar to ban chukī hai mirī nahīñ aap kī zarūrat
ki is zamīñ par vajūd merā nahīñ faqat ik nishān-e-shahvat

mire vajūd meñ shāmil rahe haiñ kitne vajūd
to phir ye kaise kahūñ jo kiyā kiyā maiñ ne