Tags-Waqt

ye koī dil to nahīñ hai ki Thahar jā.egā
vaqt ik ḳhvāb-e-ravāñ hai so guzar jā.egā

vaqt paḌ jaa.e to jaañ se bhī guzar jā.eñge
ham divāne haiñ mohabbat ke adākār nahīñ

haa.e vo vāda-e-fardā kī madad vaqt-e-aḳhīr
haa.e vo matlab-e-dushvār ki āsāñ niklā

na jaane vaqt kā kyā faisla hai der kitnī hai
ghaḌī kī sūiyāñ bhī ho chukī haiñ muzmahil ab tak

shoḳhī-e-naqsh koī hādsa-e-vaqt nahīñ
mo.ajaza-e-kārī-e-ḳhūn-e-dil-e-fankār to dekh

us vaqt kā hisāb kyā duuñ
jo tere baġhair kaT gayā hai

jo bashar har vaqt mahv-e-zāt hai
qalb us kā lam-yazal mir.āt hai

ye shab-e-darāz bhī kaT ga.ī vo sitāre Duube vo pau phaTī
sar-e-rāh ġhaflat-e-ḳhvāb se ab uTho ki vaqt-e-sahar bhī hai

ajab thī hijr kī saa.at ki jaañ pe ban aa.ī
kaḌā thā vaqt vo dil par magar guzar bhī gayā

ye vaqt kā be-karāñ samundar maiñ us kī had tak pahuñch na paayā
girā thā sāhil pe TuuT kar jo huā thā jo ġharq-e-āb maiñ huuñ

vaqt kātib hai to mistar chehre
jab se tahrīr-shanāsī mirī taqdīr huī

hameñ bhī aa paḌā hai dostoñ se kaam kuchh ya.anī
hamāre dostoñ ke bevafā hone kā vaqt aayā

tū agar āzād lamhoñ kā payambar hai 'najīb'
raat kī zanjīr kyuuñ phir vaqt ke paañv meñ thī

merī barbādiyoñ kī ye tasvīr
gardish-e-vaqt kī hai ek lakīr

nahīñ hotā hai koī kaam hargiz vaqt se pahle
umīd-o-ārzū meñ dil ko taḌpāne se kyā hāsil

rañg-e-shikasta sub.h-e-bahār-e-nazāra hai
ye vaqt hai shaguftan-e-gul-hā-e-nāz kā

hāthoñ meñ vaqt ke to koī sañg bhī na thā
kyuuñ TuuT kar bikhar ga.e ā.īna-vār log

aisā ik vaqt jab aatā hai to kyā karte ho
dil jo karnā nahīñ chāhe vahī karnā paḌ jaa.e

tum itnā muḳhtasar sā vaqt le kar aa.e hī kyoñ the
idhar aane meñ derī kī udhar jaane kī jaldī thī

ġham-e-duniyā ko bas merī taraf aane kī jaldī hai
har achchhe vaqt ko mujh se bichhaḌ jaane kī jaldī hai