Tags-Waqt

vaqt ne aisī karvaT badlī phuul khile bastī ujḌī
vahshat kā vo zor baḌhā ābād huā vīrāna bhī

ai 'valī' sarv-qad ko dekhūñgā
vaqt aayā hai sarfarāzī kā

'kamāl' ne jo paḌhā vaqt-e-qatl maqtal meñ
sunā huā sā lagā vo kalām kis kā hai

bhulā baiThe ho ham ko aaj lekin ye samajh lenā
bahut pachhtāoge jis vaqt ham kal yaad ā.eñge

vaqt aisā bhī to aayā hai junūñ par 'sārim'
nok-e-mizhgān se talvār uThā.ī ga.ī hai

kyā bhalā apnī samā.at meñ ghule koī miThās
vaqt ke hoñToñ se kab talḳh-navā.ī ga.ī hai

sarsar-e-vaqt se ġhāfil thā tū ai kibr-nazād
gir ga.ī ḳhaak zamīñ par tirī dastār uThā

Dagmagāte haiñ qadam Doltī hai vaqt kī saañs
tār-e-hastī pe sambhaltā nahīñ tū bhī maiñ bhī

guzishtagāñ meñ hamārā shumār hone meñ
ab aur vaqt hai kitnā ġhubār hone meñ

ujāle tel chhiḌakne lage ujāloñ par
ajiib vaqt paḌā hai charāġh vāloñ par

vaqt ārām kā nahīñ miltā
kaam bhī kaam kā nahīñ miltā

har vaqt ḳhizāñ ke jhoñkoñ se Darte rahte ham bhī 'manzar'
siine meñ kabhī armānoñ kā ġhuncha na khilā achchhā hī huā

ilm ne aaj kurede haiñ vo zulmāt ke Dher
vaqt ne jis pe biThā.e the fanā ke pahre

bhareñ na vaqt ke hāthoñ jarāhateñ terī
rakheñ sambhāl ke dil ne amānateñ terī

ain mumkin hai ki kal vaqt faqat merā ho
aaj muTThī meñ ye aayā huā pahlā din hai

tez-raftār sahī laakh mirā azm-e-safar
vaqt āvāz jo degā to Thahar jā.ūñgā

chhoTī moTī hasratoñ ko vaqt le kar uḌ gayā
chain se marne kī ḳhvāhish zindagānī le ga.ī

ai vaqt-shanāso ye kaḌā vaqt hai kaisā
ai dast-shanāso mirā tum haat to dekho

ḳhud-numā.ī bhī ajab zulm hai 'nūrī' mujh par
haa.e vo vaqt ki maiñ ḳhud se gurezāñ niklā

gumāñ huuñ yā haqīqat sochne kā vaqt kab tak
ye ho kar bhī na hone kī musībat ab huī hai