Tags-Waqt

vaqt achchhā bhī aa.egā 'nāsir'
ġham na kar zindagī paḌī hai abhī

yuuñ maiñ sahmā huā ghabrāyā huā rahtā huuñ
jaise har vaqt kisī baat kā Dar hotā hai

yuuñ to har shaḳhs ye kahtā hai kharā sonā huuñ
kaun kis ruup meñ hai vaqt batā hī degā

zaḳhmī lafzoñ pe bhī hañs hañs ke agar daad mile
ham se shā.ir to usī vaqt hī mar jaate haiñ

merī miTTī meñ alag shai hai koī kūza-gar
vaqt-e-tajsīm mirī ḳhaak nahīñ chhānī kyā

raat bhar narm havāoñ ke jhoñke
vaqt kī mauj ravāñ par bahte

vaqt se pahle ho kyuuñ zehn pe ḳhurshīd kā bojh
raat baaqī hai abhī chāñd piyāloñ meñ rahe

kaun Dūbegā kise paar utarnā hai 'zafar'
faisla vaqt ke dariyā meñ utar kar hogā

'zafar' ye vaqt hī batlā.egā ki āḳhir ham
bigāḌte haiñ zabāñ yā zabāñ banāte haiñ

rāteñ apnī raushan kar lo ashkoñ se 'shāyān' abhī
vaqt se pahle apne safar kī tayyārī dānā.ī hai

siyāh raat nahīñ letī naam Dhalne kā
yahī to vaqt hai sūraj tire nikalne kā

mujrim the jo ham so qaid hue sayyād magar ab ye to batā
har vaqt ye kis ko DhūñDte haiñ dīvār ke saa.e zindāñ meñ

markaz meñ thā so dhyān meñ rakkhā gayā mujhe
har vaqt imtihān meñ rakkhā gayā mujhe

zaḳhmoñ se thā niDhāl magar mauj-e-vaqt ko
chāhat kā naqsh siine se dhone nahīñ diyā

har vaqt gulistāñ pe ḳhizāñ kī haiñ nigāheñ
khulte hue phūloñ kā bharosā bhī nahīñ hai

birah kā jaan kundan hai nipaT saḳht
dikhā is vaqt par dīdār mohan

ahd-e-tiflī meñ jise ziist kā hāsil jaanā
vaqt kā ab unhī bātoñ meñ ziyāñ hotā hai

dīvār ban ke vaqt agar rāsta na de
jhoñkā havā kā ban ke guzar jaanā chāhiye

bā-hama yūrish-e-ālām-o-sitam zinda huuñ maiñ
mus.haf-e-vaqt kā ik bāb-e-daraḳhshanda huuñ maiñ

nazar ke sāmne ka.aba bhī hai kalīsā bhī
yahī to vaqt hai taqdīr āzmāne kā