Tags-Waqt

vaqt-e-ruḳhsat aa.egā aur ḳhatm hogā ye safar
mere dil kī baat mere dil meñ hī rah jā.egī

kyā ḳhabar thī aa.egā ik roz aisā vaqt bhī
merī goyā.ī tirā muñh dekhtī rah jā.egī

mudda.ā ham apnā kāġhaz par raqam kar jā.eñge
vaqt ke hāthoñ meñ apnā faislā rah jā.egā

yuuñ sisaktā mujhe tum chhoḌ na jaao aao
āḳhirī vaqt hai ai jān-e-man aao aao

vaqt ne ye kahā hai ruk ruk kar
aaj ke dost kal ke begāne

aañkh hai yā sair-gāh-e-roz-o-shab
vaqt hai yā jāda-e-umr-e-azīz

ḳhushk pattoñ kī tarah shāḳhoñ se gir jaate haiñ ham
vaqt kī gard-e-safar ban ke aḌe jaate haiñ ham

ik tazād-e-husn-e-ma.anī hai tirī ta.amīr meñ
dastaras meñ bhī giraft-e-vaqt se bāhar bhī tū

ai be-ḳhabarī kī niiñd sone vaalo
rāhat-talabī meñ vaqt khone vaalo

vaqt ne beḌiyāñ Daal rakkhī thiiñ paañv meñ varna to maiñ
shahr kī saarī galiyoñ ko har vaqt āvārgī bāñTtā

zindagī aag pe leTī huī parchhā.īñ hai kyā
bas dhuāñ detī hai har vaqt jigar meñ koī chiiz

qāsid nahīñ ye vaqt savāl-o-javāb kā
ab haal ġhair hai dil-e-ḳhāna-ḳharāb kā

kyuuñ hue qatl ham par ye ilzām hai qatl jis ne kiyā hai vahī mudda.ī
qāzī-e-vaqt ne faisla de diyā laash ko nazr-e-zindāñ kiyā jā.egā

hai jabr vaqt kā qissa ajab sunā.e kaun
maiñ yaad us ko karūñ aur yaad aa.e kaun

gar ishq ke kūche meñ guzar kiije to vaañ bhī
har vaqt na.ī sair hai har aan tamāshā

suune kitne baam hue kitne āñgan be-nūr hue
chāñd se chehre yaad aate haiñ chāñd nikalte vaqt bahut

pal bhar meñ paanī hote dekhe haiñ sanam kirdāroñ ke
ham kaise kah deñ lagtā hai sañg pighalte vaqt bahut

un shīshoñ ke rezoñ kā marham hai apne zaḳhmoñ par
lamha lamha jo TuuTe talvāreñ chalte vaqt bahut

vo parcham vo sar ke turre aur vo safīne apne the
jin ko dekh ke sho.ale bhī ro.e the jalte vaqt bahut

do nasloñ kī kashtī thī vo pichhle dinoñ jo Duub ga.ī
bhīge jismoñ vaalo lagegā tum ko sambhalte vaqt bahut