Tags-Waqt

magar abhī ḳhāk-zār meñ sail-e-vaqt ke darmiyān āñkheñ
fasurda-o-tishna-kām āñkheñ taras rahī haiñ

fishār-e-vaqt meñ nok-e-qalam huī larzāñ
lahū ke shor meñ dil kī kahī nahīñ jaatī

ab mirī shab mire ashkoñ se rahegī raushan
shaam ke vaqt diyā merā bujhā hai yaaro

tum vaqt ke apne ho masīhā
murde ke ta.iiñ jilāo sāhib

vaqt paḌne pe aazmā lenā
jaan de deñge ik ishāre par

vaqt ne paiham lagā.e dil pe zaḳhm
vaqt ḳhud hī un kā phir marham huā

tasvīr ke do ruḳh haiñ jaañ aur ġham-e-jānāñ
ik naqsh chhupānā hai ik naqsh dikhānā hai

ab khul ke kahūñgā har ġham-e-dil 'majrūh' nahīñ vo vaqt ki jab
ashkoñ meñ sunānā thā mujh ko aahoñ meñ ġhazal-ḳhvāñ honā thā

desh se jab pardesh sidhāre ham par ye bhī vaqt paḌā
nazmeñ chhoḌī ġhazleñ chhoḌī gītoñ kā bevpār kiyā

sadā aish daurāñ dikhātā nahīñ
gayā vaqt phir haath aatā nahīñ

tez hai vaqt kī raftār bahut
aur bahut thoḌī sī fursat hai mujhe

vo zahr detā to sab kī nigah meñ aa jaatā
so ye kiyā ki mujhe vaqt pe davā.eñ na diiñ

mauqe kī ab to ye hai jo vaqt-e-shab hai ai jaañ
ham baiThe paañv dābeñ aur aap ḳhvāb kiije

bhīgī palkeñ shauq kā aalam vaqt kā dhārā kyā nahīñ dekhā
hañste aañsū talḳh tabassum mīThā ġhussa kyā nahīñ dekhā

dayār-e-ḳhvāb meñ ik shaḳhs ham-qadam thā magar
paḌā jo vaqt to rasta badal gayā vo bhī

ye us kī yaad kā e.ajāz thā ki ab ke baras
jo vaqt ham pe kaḌā thā so Tal gayā vo bhī

karte rahte haiñ jo har-vaqt tumhārā charchā
ḳhud ko chhoḌeñge kisī roz tumhārā kar ke

vaqt to har ek dar par dastakeñ detā rahā
ek saa.at ke liye jaagī na bastī raat ko

vaqt kī nazākat kā aaj jo taqāzā hai jurm kal na kahlā.e
toḌ do ḳhamoshī ke āhanī hisāroñ ko khol do zabāñ logo

ḳhair ham to kāñTe the aur hameñ kuchalnā bhī vaqt kā taqāzā thā
phuul jin ko samjhe the ab sunā hai un se bhī haiñ vo sargirāñ logo