Tags-Waqt

vo zinda hai jo bahe mauj-e-vaqt kī rau meñ
vo zinda-tar hai jo tūfāñ meñ Thairnā jaane

yuuñ mehr se farmāyā us maah ne vaqt-e-sub.h
ham jaane haiñ ab terā 'bedār' ḳhudā-hāfiz

jab achchhe the din raat kam yaad aa.e
burā vaqt aayā to ham yaad aa.e

vaqt kī aañkh meñ sadiyoñ kī thakan hai, maiñ huuñ
dhuul hote hue rastoñ kā badan hai, maiñ huuñ

jab zarā sā vaqt guzrā
aql ke tāroñ kī jumbish se badan jaagā

āgahī kā sadqa vājib hai uThāo jām-e-zahr
lamha lamha vaqt kā isrār baḌhtā jaa.e hai

mushkil ke vaqt dil hī se kuchh mashvara kareñ
kyuuñ deñ kisī ko ġhair se ham pūchh kar javāb

phir vaqt kā palḌā sirf siyāsat aur tash.hīr meñ jhuul gayā
do chaar purāne jame rahe par 'mīrā-jī' ko ek zamāna bhuul gayā

hama-vaqt mumkin nahīñ vasl-e-dilbar
hañsī-khel kiyā jān-e-muztar banāyā

vaqt kī zanjīr to kaT nahīñ saktī magar
khol ghaḌī do ghaḌī

hai yaad josh ye jis vaqt ashk-bārī thī
to ek nahr usī āstīñ se jaarī thī

bichhaḌte vaqt kisī aañkh meñ jo aatā hai
tamām umr vo aañsū bahut rulātā hai

har ghaḌī rahtā hai ab ḳhadshā mujhe
pī na jaa.e vaqt kā dariyā mujhe

maut ke vaqt paas aa jaanā
kaam karnā mirā zarūr itnā

na qahr raftār-e-nāz Dhaa.e lachak na vaqt-e-ḳhirām aa.e
ḳhudā hī nāzuk kamar bachā.e ki pā.eñche vo sambhālte haiñ

ā.ankhoñ meñ vīrānī sī hai palkeñ bhīgī baal khule
tū be-vaqt pashemāñ kyuuñ hai ham par bhī kuchh haal khule

shaam ke haath ne jis vaqt lagā lī mehñdī
mujhe us vaqt tirā rañg-e-hinā yaad aayā

jaate hī yaar ke tū kahtā thā mar rahūñgā
vaqt-e-vidā.a ai dil āḳhir tū mar gayā na

vaqt aatā hai jo suulī se utarne kā mirī
sach simaT kar mirī guftār se lag jaate haiñ