Tags-Waqt

chup chup makān rāste gum-sum niDhāl vaqt
is shahr ke liye koī dīvānā chāhiye

havas-e-vaqt kā andāza lagāyā jaa.e
raat pāgal huī darvāza lagāyā jaa.e

apne parā.e thak ga.e kah kar har koshish bekār rahī
vaqt kī baat samajh meñ aa.ī vaqt hī ke samjhāne se

añdheroñ ne luuTī ujāloñ kī daulat
uḌā le gayā vaqt ik ḳhvāb-e-rāhat

hameñ ye Dar hai ki phir se biphar na jaa.e kahīñ
qadam baḌhāo ki is vaqt utar ga.ī hai nadī

hai 'amjad' aaj tak vo shaḳhs dil meñ
ki jo us vaqt bhī merā nahīñ thā

sahar ke vaqt kaise chhoḌ jaatā
tumhārī yaad thī sapnā nahīñ thā

ye to vaqt vaqt kī baat hai hameñ un se koī gila nahīñ
vo hoñ aaj ham se ḳhafā ḳhafā kabhū ham se un ko bhī pyaar thā

us ne bar-vaqt be-ruḳhī bartī
shauq āzār tak nahīñ pahuñchā

bazm-e-tarab vaqt-e-aish saaqī o naql o sharāb
koī ise kuchh kaho ham to samajhte haiñ ḳhvāb

aaj ke daur meñ apnī hī pahchān huī dushvār
dekh rahe haiñ vaqt kā darpan chāñd havā aur maiñ

rañg apne apne vaqt pe khulte haiñ aañkh par
avval fareb hai koī saanī fareb hai

nākām-e-nashāt-e-aish-o-ḳhushī har vaqt ke ranj-o-ġham ne kiyā
jo tum ne kahā vo dil ne kiyā jo dil ne kahā vo ham ne kiyā

thī āqibat kī ḳhāmushī tanhā.iyoñ kī chīḳh
duniyā ye kah rahī thī mirā vaqt mar gayā

mahaktā thā badan har vaqt jis ke lams-e-ḳhush-bū se
vahī gul-dasta dahlīz-e-ḳhizāñ par chhoḌ denā thā

hai ye vajūd kī numūd apnī nafas nafas gurez
vaqt kī saarī bastiyāñ apnī hazīmatoñ meñ haiñ

vaqt kī darmiyāniyāñ kar ga.iiñ jāñ-kanī ko jaañ
vo jo adāvateñ ki thiiñ aaj mohabbatoñ meñ haiñ

vaañ nahīñ vaqt to ham bhī haiñ adīm-ul-fursat
us se kyā miliye jo har roz kahe kal milnā

zab.h ke vaqt bhī qātil ko duā.eñ dī haiñ
qatre qatre se Tapaktī hai vafā mere ba.ad

bichhaḌne vaale ne vaqt-e-ruḳhsat kuchh is nazar se palaT ke dekhā
ki jaise vo bhī ye kah rahā ho tum apne ghar kā ḳhayāl rakhnā