Tags-Waqt

āḳhirī vaqt aa gayā hai kyā
de rahe haiñ sabhī duā mujh ko

kis vaqt judā mujh se vo kambaḳht huī thī
DhūñDūñ huuñ bahut aur shab-e-furqat nahīñ miltī

agar vo chāhe bhī ik pal to jī nahīñ saktā
ajal kā vaqt muqarrar hai kyā kiyā jaa.e

vo jab ki tujh se umīdeñ thiiñ merī duniyā ko
vo vaqt biit chukā hai vo ġham guzar chukā hai

chhū kar bulandiyoñ se utarne lagā huuñ maiñ
shāyad nigāh-e-vaqt se Darne lagā huuñ maiñ

ye koī baat hai jo tujh ko batā.ī jaa.e
shaam ke vaqt udāsī kā sabab kyā hogā

ik vaqt thā ki raah guzarnā muhāl thā
ab muḌ ke rāste meñ koī dekhtā nahīñ

ā.ina-ḳhānoñ kī yak-rañgī se uktā ke 'ra.īs'
āzar-e-vaqt bhī patthar ke sanam māñge hai

gayā jo haath se vo vaqt phir nahīñ aatā
kahāñ umiid ki phir din phireñ hamāre ab

saa.e kī tarah mire saath rahe ranj o alam
gardish-e-vaqt kahīñ raas na aa.ī mujh ko

vaqt-e-ruḳhsat alvidā.a kā lafz kahne ke liye
vo tire sūkhe laboñ kā thartharānā yaad hai

ham ne mahal banā.e the kuchh regzār par
jin ko bahā ke vaqt kā sailāb le gayā

saaqī kī nigāh-e-mast mujhe jab yaad 'shamīm' aa jaatī hai
us vaqt hī apne taaq se maiñ shīshoñ ko utārā kartā huuñ

har kiran vaqt-e-sahar kahtī hai
rauzan-e-dil koī vā hai ki nahīñ

vaqt raste meñ khaḌā hai ki nahīñ
dil se ab pūchh ḳhudā hai ki nahīñ

'qaisar'! zamīr-e-vaqt ko dekhā kured ke
sadiyāñ rakhī thiiñ dosh pe muTThī meñ pal na thā

kisī ke dil kā sukūñ huuñ kisī ke dil kī ḳhalish
zamīr-e-vaqt huuñ aur qalb-e-kā.enāt meñ huuñ

aah bhar kar chal diye sab hī tamāsha dekh kar
vaqt par jo DaT gayā vo devtā sābit huā

utar ga.ī hai mire jism meñ jo ye vahshat
nikalte vaqt yahī umr-e-jāvedāñ legī

aa.egā phir chaman pe tasarruf kā vaqt bhī
pahle qafas kī āb-o-havā dekhte chaleñ