Tags-Waqt

mirā to vaqt ghar se kuuch hī kā hai
savāl saare ghar kī zindagī kā hai

vaqt-e-ruḳhsat yahī kahtī thiiñ barastī āñkheñ
paas mere tujhe phir lauT ke aanā hogā

kab talak hijr kī agan meñ jalūñ
aa bujhāne kā vaqt aayā hai

mulk-e-vīrān kuuñ mire dil ke
phir basāne kā vaqt aayā hai

shab-e-ḳhalvat meñ us parī-rū kuuñ
dukh sunāne kā vaqt aayā hai

nīm-bismil huuñ teġh-e-abrū siiñ
tilmilāne kā vaqt aayā hai

misl-e-parvāna sham.a-rū pe 'sirāj'
dil jalāne kā vaqt aayā hai

piiv ke aane kā vaqt aayā hai
jī ke jaane kā vaqt aayā hai

piiv ke ġham meñ anjho bahātā huuñ
kyā bahāne kā vaqt aayā hai

shaam ke vaqt to koThe pe jo aatā hai kabhī
dekh kar tujh ko ye ḳhurshed chhupā jaatā hai

phir yuuñ huā ki vaqt kā pāñsa palaT gayā
ummīd jiit kī thī magar maat ho ga.ī

vaqt kī qaid meñ rahā itnā
panchhī uḌtā nahīñ uḌāne par

itnā na paas aa ki tujhe DhūñDte phireñ
itnā na duur jā ke hama-vaqt paas ho

'jamāl' us vaqt koī mujh se bichhaḌ rahā thā
zamīn aur āsmāñ jab ek ho rahe the

chhoḌ mat naqd vaqt-e-nasiya par
aaj jo kuchh hai so kahāñ kal hai

phir ḳhud hī dil bol uThtā hai ab vaqt badalne vaalā hai
zarre sūraj ban jā.eñge vo daur bhī aane vaalā hai

jaañ vaqf-e-tapish ho jaatī hai aur azm-e-baġhāvat kartī hai
us vaqt ik sail irādoñ kī sīnoñ se ho ke guzartī hai

hazrat-e-vā.iz na aisā vaqt haath aa.egā phir
sab haiñ be-ḳhud tum bhī pī lo kuchh agar shīshe meñ hai

tiflī se piirī tak mire ahvāl sun lenā kabhī
vaqt-e-vilādat hī bahut kosā gayā thā ek maiñ

ishq meñ vo bhī ek vaqt hai jab
be-gunāhī gunāh hai pyāre