Tags-Waqt

masīh-e-vaqt ab aa.e to bas ḳhudā aa.e
payambaroñ kī zamīñ aur azaab chāroñ taraf

kis ko mehrbāñ kahiye kaun mehrbāñ apnā
vaqt kī ye bāteñ haiñ vaqt ab kahāñ apnā

bichhaḌte vaqt ye ḳhvāhish kahāñ thī nā-jā.ez
use bhī hotā hamārī tarah malāl zarā

subuk-sar rah chuke haiñ ham bhī duniyā meñ kabhī lekin
ye zikr us vaqt kā hai aap jab the sargirāñ ham se

muskurātī zindagī ke ḳhuun kā pyāsā uqaab
vaqt ke hāthoñ meñ zaḳhmī fāḳhta de jā.egā

maiñ jis lamhe guzarte vaqt ko mahsūs kartā huuñ
vo ik lamha 'farāsat' ranj-e-māh-o-sāl detā hai

be-samt sā ik aaj ki maazī hai na fardā
ye vaqt kā sailāb kahāñ chhoḌ gayā hai

uḌ jā.eñgī fazā meñ bahāroñ kī dhajjiyāñ
jis vaqt taar taar garebāñ kareñge ham

ai vaqt san ki aa.egā jab bhī hamārā vaqt
tūfāñ ko mauj mauj ko tūfāñ kareñge ham

chhīntā ho jab tumhārā haq koī us vaqt to
aañkh se aañsū nahīñ sho.ala nikalnā chāhiye

vaqt mile to gul-daste kā haath pakaḌ kar aa jaanā
varna kahnā kaam bahut hai aane meñ dushvārī hai

merī be-ḳhvāb nigāheñ haiñ samundar shab hai
vaqt tham tham ke jo guzre hai sahar ko tarse

kahtā hai ziyāda milne se va.adoñ kī ḳhalish baḌh jā.egī
kuchh va.ade vaqt pe bhī chhoḌo dekho vo kyā dikhlātā hai

ruḳhsat hote vaqt
us ne kuchh nahīñ kahā

ho sitam kaisā bhī ab hālāt kī shamshīr kā
vaqt badlegā kisī din ruḳh mirī tasvīr kā

jahān-e-vaqt kī rau meñ the sañg kī sūrat
qadam qadam pe lagīñ Thokareñ sambhalne tak

shauq se aa.e burā vaqt agar aatā hai
ham ko har haal meñ jiine kā hunar aatā hai

lamhoñ kī kalā.ī meñ bas yaad khanaktī hai
bah jaate haiñ sab is meñ ye vaqt kā dhārā hai

kar diyā mujtahid-e-vaqt ko qātil jhaT-paT
ham ne masjid meñ kal aise hī qayāmat kī bahs