Tags-Waqt

ḳhvāh muflisī se nikal gayā yā tavañgarī se nikal gayā
vahī vaqt asl-e-hayāt thā jo hañsī-ḳhushī se nikal gayā

jin āsmānoñ meñ sayyāl-e-vaqt sākit hai
kamand Daal vahāñ jū-e-shīr khīñchtā huuñ

davā kā vaqt ab baaqī nahīñ hañgām-e-ruḳhsat hai
sidhāreñ chāra-gar ab der kyā hai niiñd aane meñ

hamāre dil se koī pūchhe qadr us mai kī
jo ek buuñd sahī vaqt-e-tishnagī to milī

āḳhirī vaqt hai āḳhirī saañs hai zindagī kī hai shaam āḳhirī āḳhirī
sañg-dil aa bhī jā ab ḳhudā ke liye lab pe hai terā naam āḳhirī āḳhirī

na itnā chheḌ kar ai vaqt dīvāna banā ham ko
hue dīvāne ham to sab ko dīvāna banā deñge

baiThe sāhil par ginā karte haiñ jo lahreñ 'asar'
vaqt paḌne par bhalā kyā dhāre dhāre jā.eñge

ye dīvāreñ bhī ab girne lagī haiñ
yahāñ bhī vaqt kā saayā paḌā hai

zālim ne liyā hai sharmā kar phir gosha-e-dāmāñ chuTkī meñ
hai vaqt ki tum bebākī se ab dīda-e-tar kī baat karo

aayā hai chaman meñ mausam-e-gul aa.ī haiñ havā.eñ zindāñ tak
dīvār kī bāteñ ho leñgī is vaqt to dar kī baat karo

sone ke vaqt ai gul-e-tar itr kyā zarūr
terī galī meñ raat ko champā-kalī rahe

jiine kī sūrat us kī Thahartī hai koī dam
is vaqt meñ bhī pahuñcho jo us be-qarār tak

ai mo.arriḳh mirī ujḌī huī sūrat pe na jā
shahr-e-vīrāñ huuñ magar vaqt kā sarmāya huuñ

piirī meñ to ye sab bāteñ zāhid achchhī lagtī haiñ
zikr-e-ibādat bharī javānī meñ jaise be-vaqt kā raag

raah kaThin hai duur hai manzil vaqt bachā hai thoḌā sā
ab to sūraj aa gayā sar par sone vaale ab to jaag

kaun yaad aa gayā azaañ ke vaqt
bujhtā jaatā hai dil charāġh jale

kaam aa.ī hai vahī chhāñv ghanī bhī jo na thī
vaqt kī dhuup meñ jis vaqt maiñ kumhlāyā huuñ

khoyā kyā paayā kyā hisāb na kar
to abas vaqt ko ḳharāb na kar

hai aane vaale vaqt se ik 'rūbī' ḳhauf sā
ummīd kā diyā koī jaltā dikhā.ī de

tum bin vaqt ye kaisā guzrā
ashkoñ kā ik dariyā guzrā