Tags-Waqt

ik ajnabī kī tarah hai ye zindagī mire saath
jo vaqt kaaT rahī hai hañsī-ḳhushī mire saath

āñkheñ hī iz.hār kareñ to shāyad koī baat bane
sūraj Dhalte vaqt jo dekhī thī vīrānī dariyā kī

zamāne vaale samajhte haiñ ham ko dīvāna
tumhāre husn ke jis vaqt giit gaate haiñ

ham kisī aur vaqt ke haiñ asiir
sub.h ke shaam ke rahe hī nahīñ

sifārish ham-damoñ kī un kā jaate vaqt ye kahnā
ki jab taḌpe mirī tasvīr siine se lagā denā

saare ahd kā bojh thā sar par dil meñ saare jahāñ kā ġham
vaqt kā jaltā ubaltā sahrā ham ne jis dam paar kiyā

zehn se ik ik kar ke terī saarī bāteñ utar ga.iiñ
kabhī kabhī to vaqt ne ham ko aisā bhī nā-chār kiyā

mire dushman bhī ab to aa rahe haiñ
tumheñ kis vaqt jaane kī paḌī hai

qazā kā vaqt ruḳhsat kī ghaḌī hai
zarā Thahro ki ye manzil kaḌī hai

dekhī jo raqs kartī huī mauj-e-zindagī
merā ḳhayāl vaqt kī shahnā.ī ban gayā

kisī bhī vaqt ye manzar badalne vaalā hai
dikhā.ī dene lagā hai ġhubār se bāhar

ab tark-e-dostī hī taqāzā hai vaqt kā
terā qayās gar hai yahī to qayās kyā

ai ḳhizr! qutb-e-vaqt kī tā-chand justujū
merā murīd ho ki qavī-ul-irāda hoñ

vaqt-e-zīnat sun ke vo merī pareshānī kā haal
apne gesū be-sañvāre yuuñ ke yūñhīñ rah ga.e

aayā jo mehrbāñ ho sitamgar tū is taraf
kis vaqt kī na jāniye tujh ko duā lagī

dāman-e-vaqt pe ab ḳhuun ke chhīñTe na paḌeñ
ek markaz kī taraf dair-o-haram le ke chalo

ye zaḳhm jis ko vaqt kā marham bhī kuchh nahīñ
ye dāġh, sail-e-girya jise dho nahīñ rahā

chhoḌ kar us vaqt ohde ḳhud chalā jā.ūñgā maiñ
shak jahāñ koī mire īmān par karne lage

vaqt ḳhud nā-pā.edārī ke liye mash.hūr hai
aise be-taufīq se maiñ ḳhaak shohrat māñgtā

mulk kī barbādiyāñ us vaqt tai ho jā.eñgī
jab burī tahzīb bachchoñ par asar karne lage