Tags-Waqt

har vaqt ik ye dhun hai ki meñ tajziya karūñ
mujh ko mire junūn-e-tajassus ne kyā diyā

tirī raah kitnī tavīl hai mirī ziist kitnī qalīl hai
mirā vaqt terā asiir hai mujhe lamha lamha sañvār de

shaam hotī hai sahar hotī hai ye vaqt-e-ravāñ
jo kabhī sañg-e-girāñ ban ke mire sar pe girā

ye sañg-e-ḳhvāb 'shafaq' aañkh ke pasīne par
kisī bhī vaqt phisal jā.egā ḳhabar nahīñ thī

ham apne aap meñ āzād haiñ lekin ḳhudāvandā
hamāre dast-o-pā meñ vaqt kī zanjīr kaisī hai

māyūs ho chale haiñ malāmat-garān-e-ishq
vo vaqt hai ki baat samajhtā nahīñ huuñ maiñ

shikast-e-e'timād-e-zāt ke vaqt
qayāmat aa rahī thī aa ga.ī kyā

tū ne ai vaqt palaT kar bhī kabhī dekhā hai
kaise haiñ sab tirī raftār ke maare hue log

shart mat rakh ki rah-e-ishq-e-butāñ meñ 'ādil'
vaqt kī rū se baġhāvat nahīñ kī jā saktī

duāoñ meñ jinheñ maañ baap yaad hī na rakheñ
amīr-e-vaqt hoñ lekin ġharīb hote haiñ

yazīd-e-vaqt ko jo barmalā hī Tok sake
raqam vo naam hī zer-e-salīb hote haiñ

rah banātā jā rahā huuñ dasht meñ 'mansūr' maiñ
vaqt kī āñdhī uḌātī jā rahī hai rāsta

har-vaqt hai koft apne dil ko
rah rah kar siina kūTte haiñ

baḌe sīdhe saade baḌe bhūle bhāle
koī dekhe is vaqt chehrā tumhārā

chalo bāl-o-par ko sameT leñ kareñ fikr ab kisī Daal kī
ye ġhurūb-e-mehr kā vaqt hai ye ghaḌī hai din ke zavāl kī

ye ghar haiñ yā ba-vaqt-e-shām 'sājid'
svāgat ke liye khultī haiñ jeleñ

vaqt aisā koī tujh par aa.e
ḳhushk āñkhoñ meñ samundar aa.e

vaqt aa paḌā aisā vaqt hī nahīñ miltā
chhuT gayā hai barsoñ se apnā ronā-dhonā bhī

mere taḳhlīq-e-adab meñ hai qasīda mādūm
mujh se 'ehsān' kisī vaqt ye isyāñ na huā

mehr-vash husn kī garmī se tire vaqt-e-araq
tan pe gar nīma-e-malmal na jale ḳhushk to ho