Tags-Waqt

dil meñ thī maujzan ḳhushī shauq fuzūñ thā har ghaḌī
din meñ jo kuchh umiid thī ho ga.ī vaqt-e-shab ġhalat

phir vaqt ke siine kī dhaḌkan na sunā.ī de
phir jaam ke shīshe se Takrāne kī bāteñ hoñ

duniyā pe aisā vaqt paḌegā ki ek din
insān kī talāsh meñ insān jā.egā

vaqt kī sarkash havāo! jab diyā bujh jā.egā
sub.h kī sūrat meñ us kī raushnī rah jā.egī

'āzim' terī barbādī meñ sab ne mil-jul kar kaam kiyā
kuchh khel lakīroñ kā bhī hai kuchh vaqt kī kār-guzārī bhī

jahannam se koī kah de zarā hoshiyār ho jaa.e
ġhazab kā vaqt hai qabroñ se dāman tar nikalte haiñ

vo paḌhāte vaqt darje meñ hazār baar barse
jo mujhe bhī chhī.k aatī unheñ nāgavār hotā

kyā ajab shaḳhs thā har baat pe ḳhush rahtā thā
vaqt kyā badlā ki vo DhūñDe se miltā hī nahīñ

bajā ki donoñ vaqt phir se aa mile
magar jo vaqt darmiyāñ se haT gayā

tirī galī kā apnā ek vaqt thā
isī meñ merā saarā vaqt kaT gayā

har vaqt kā hañsnā tujhe barbād na kar de
tanhā.ī ke lamhoñ meñ kabhī ro bhī liyā kar

dekhnā un ko bhī Das legī kaḌe vaqt kī dhuup
vo jo kuchh ḳhvāhish-e-shādāb liye phirte haiñ

ābādiyoñ kī ḳhair manāne kā vaqt hai
jañgal kī aag phail rahī hai havā ke saath

maiñ rūhoñ ke iqrār ke vaqt
jaane kahāñ kaun sī saf meñ thī

maiñ jam.a kartā huuñ shab ke siyāhī qatroñ ko
ba-vaqt-e-sub.h phir un ko palaT ke sotā huuñ

āmāda rakheñ chashm-o-dil sāmān-e-hairānī kareñ
kyā jāniye kis vaqt vo nazāra farmānī kareñ

tum bhī ho biite vaqt ke mānind hū-ba-hū
tum ne bhī yaad aanā hai aanā to hai nahīñ

havā hue vo din ki ġhazal kartī thī bas mahbūb se baat
vaqt kā manzar-nāma badlā badlī tarjīhāt ġhazal kī

kahīñ ummīd sī hai dil ke nihāñ ḳhāne meñ
abhī kuchh vaqt lagegā use samjhāne meñ

nahīñ hai vaqt kī jur.at ki chhū sake us ko
ye terā husn ki jab tak mirī panāh meñ hai