Tags-Waqt

ġhash huuñ maiñ vaqt-e-bosa jo kahtā hai hañs ke vo
muñh ko haTā haTā ke ba-takrār bas jī bas

huuñ nā-umīd vasl se yuuñ jaise vaqt-e-naza.a
ro kar kahe tabīb se bīmār bas jī bas

kyā huā thā zarā patā to chale
vaqt kyā thā ghaḌī banāte hue

dard kī aag bujhā do ki abhī vaqt nahīñ
zaḳhm-e-dil jaag sake nashtar-e-ġham raqs kare

gar chhupnā bhī khul jāvegā to mil kar afsūñ-sāzoñ se
kuchh aur hī laTkā sehr-bharā us vaqt baham pahuñchā.eñge ham

koī baat ḳhvāb-o-ḳhayāl kī jo karo to vaqt kaTegā ab
hameñ mausamoñ ke mizāj par koī e'tibār kahāñ rahā

duā ke haath meñ ḳhanjar baḌā ajiib lagā
badalte vaqt kā manzar baḌā ajiib lagā

koī pūchhe to na kahnā ki abhī zinda huuñ
vaqt kī kokh meñ ik lamha-e-ā.inda huuñ

ai nā-ḳhudā-e-vaqt na itnā ġhurūr kar
Duube haiñ sāhiloñ pe safīne kabhī kabhī

vaqt kī gardishoñ kā ġham na karo
hausle mushkiloñ meñ palte haiñ

chāk-dāmāñ kī numā.ish meñ ye ġham haiñ mujh ko
vo bhī maujūd thā us vaqt-e-tamāshā.ī meñ

ab kī baar jo ghar jaanā to saare album le aanā
vaqt kī dīmak lag jaatī hai yādoñ kī almārī meñ

hai yahī vaqt ki patthar se ḳhudā paidā ho
dekh ab nuur Tapakne lagā peshānī se

dil meñ ik vaqt-e-tarab-nāk kā armān liye
ḳhud ko yuuñ vaqf-e-ġham-o-gardish-e-hālāt na kar

ittifāq-e-vaqt thā apnā faroġh-e-āshiyāñ
jab koī jugnū chamak uTThā ujālā ho gayā

ash.ār-e-'nushūr' aksar un kī bhī zabāñ par haiñ
chup rah na sakā koī jab vaqt-e-kalām aayā

har vaqt fikr-e-marg-e-ġharībāna chāhiye
sehhat kā ek pahlū marīzāna chāhiye

maiñ to samjhā thā jis vaqt mujh ko vo mileñge to jannat milegī
kyā ḳhabar thī rah-e-āshiqī meñ saath un ke qayāmat milegī

dekh ai merī zabūñ-hālī pe hañsne vaale
vaqt kī dhuup ne kis darja nikhārā mujh ko

sumūm-e-vaqt ne lahje ko zaḳhm zaḳhm kiyā
vagarna ham ne qarīne sabā ke rakkhe the