Tags-Waqt

vaqt ne us ke muqaddar meñ likhī tārīkī
jis ne chaḌhte hue sūraj kī taraf-dārī kī

nahīñ gardishoñ meñ jo vaqt kī ho atā vo sā.at-e-māvarā
na to ibtidā ho na intihā na hoñ silsile mah o saal ke

kabhī to saath ye āsīb-e-vaqt chhoḌegā
ḳhud apne saa.e ko bhī dekhnā to Dar jaanā

sīnoñ meñ iztirāb hai girya havā meñ hai
kyā vaqt hai ki shor machā hai duā duā

milne the jo bhī dard masarrat so mil ga.e
ab vaqt-e-āḳhirī ke liye kyā duā kareñ

vaqt aur hālāt par kyā tabsira kiije ki jab
ek uljhan dūsrī uljhan ko suljhāne lage

ravāñ hai
vaqt kī saffāk mehrāboñ ke nīche

vaqt kis dasht-e-farāmoshī meñ le aayā hai
ab tirā naam bhī ḳhākam-ba-dahan yaad nahīñ

ġharq hote jahāz dekhe haiñ
sail-e-vaqt-e-ravāñ samajhtā huuñ

ik aisā vaqt bhī aatā hai chāñdnī shab meñ
mirā dimāġh mirā dil kahīñ nahīñ hotā

kis muñh se kījiye lab-e-jān-baḳhsh kā bayāñ
chūsī jinhoñ ne ahmad muḳhtār kī zabāñ

ye re.āyā-e-hind tabah huī kahūñ kyā jo in pe jafā huī
jise dekhā hākim-e-vaqt ne kahā ye bhī qābil-e-dār hai

vaqt kī ḳhāmushī hai mere saath
ek bastī basī hai mere saath

gharoñ se vo bhī sadā de to kaun niklegā
hai din kā vaqt abhī log kaam par ga.e haiñ

vaqt kāfir kī ḳhudā.ī hai gunahgār bahut
saarī ma.asūm namāzoñ ko qazā samjhegī

vaqt-e-dīdār ajab hukm huā
hosh khone kī ijāzat na rahī

vaqt kī dauḌ meñ ruknā thā kaThin
saañs lene kī bhī fursat na rahī

mere ġham ko jo apnā batāte rahe
vaqt paḌne pe hāthoñ se jaate rahe

vo soz-o-sāz-e-haqīqat se āshnā hogī
vo zindagī jo hama-vaqt imtihāñ meñ hai

vaqt ne ik nazar jo Daalī hai
phuul kī tāzgī churā lī hai