Tags-Waqt

bahs us kī merī vaqt-e-mulāqāt baḌh ga.ī
bāteñ huiiñ kuchh aisī ki bas baat baḌh ga.ī

allāh tere haath hai ab ābrū-e-shauq
dam ghuT rahā hai vaqt kī raftār dekh kar

ye vaqt band darīchoñ pe likh gayā 'qaisar'
maiñ jā rahā huuñ mirā intizār mat karnā

bhejā hai ai ḳhudā mujhe kyā tū ne is liye
har vaqt zindagī meñ rahīn-e-balā rahūñ

dī shab-e-vasl mo.azzin ne azaañ pichhlī raat
haa.e kam-baḳht ko kis vaqt ḳhudā yaad aayā

vaqt ke parde pe ab to roz-o-shab
ik tamāshā-e-digar hai aur maiñ

mirī haqīqat tazād kī is girah ke khulne pe munhasir hai
maiñ vaqt kā huuñ jalīl ḳhusrav maiñ ahd kā be-navā gadā huuñ

junūñ pe koī burā vaqt aa paḌā hai kyā
divāne apne garebān kaise siine lage

raftār aur vaqt kā andāza hai kuchh aur
fitrat kī muḳhtalif hī adā hai ḳhalāoñ meñ

vaqt ne judā.ī ke zaḳhm bhar diye lekin
zaḳhm kī kahānī bhī vaqt kā hī pherā hai

vaqt kartā hai parvarish barsoñ
hādisa ek dam nahīñ hotā

qillat baḌī hai vaqt kī kyā rū-ba-rū mile
ab log sirf phone se rishte nibhāte haiñ

lahad pe ā.eñge aur phuul bhī uThā.eñge
ye rañj hai ki na us vaqt hoñge ham baaqī

mansūb haiñ tujh se jo mohabbat ke fasāne
vaqt aayā to likkheñge kabhī ḳhūn-e-jigar se

jab chal rahā thā vaqt pe jaadū nigāh kā
ik ham asīr-e-chashm-e-fusūñ-kār kyuuñ na the

vaqt badlā to tum bhī badle ho
par mire dil meñ aaj bhī ho tum

vaqt kī be-shumār ghaḌiyāñ haiñ
aur mire dil meñ har ghaḌī ho tum

javānī se ziyāda vaqt-e-pīrī josh hotā hai
bhaḌaktā hai charāġh-e-sub.h jab ḳhāmosh hotā hai

jazboñ ko zabān de rahā huuñ
maiñ vaqt ko daan de rahā huuñ

beTe meñ chāhe laakh ḳharābī ho 'muḳhtasar'
shādī ke vaqt bā.is-e-income zarūr hai