Tags-Waqt

dhuup kī bujhtī tamāzat kī sipar letā chalūñ
phir ufuq se dhīre dhīre vaqt-e-shām aatā huā

be-kār hai bahār jo aa.e na vaqt par
gar mere ba.ad aish ke sāmāñ hue to kyā

aa ga.e dil meñ vasvase kitne
vaqt jab e'tibār kā aayā

sakte tak ab aa pahuñchā hai baḌhte baḌhte karb-e-sukūt
hoñToñ par kyā vaqt paḌā hai tum bhī chup ho ham bhī chup

bhes badaltī āvāzeñ hī shām-o-sahar kahlātī hai
vaqt kā dam kyā TuuT gayā hai tum bhī chup ho ham bhī chup

vaqt-e-safar jo saath chale the
lagtā thā vo log bhale the

jhāñkne tākne kā vaqt gayā
ab vo ham haiñ na vo zamāna hai

barq se tasādum kā vaqt aa hī jā.egā
DhūñDte rahoge tum barq se amaañ yaaro

vaqt-e-pīrī shabāb kī bāteñ
aisī haiñ jaise ḳhvāb kī bāteñ

mohabbat meñ ik vaqt aisā bhī guzrā
na tum yaad aa.e na ham yaad aa.e

na jaane vaqt kab album sameT le apnā
ye tez tez havā yuuñ to chal rahī hai abhī

haath chhūTeñ bhī to rishte nahīñ chhoḌā karte
vaqt kī shāḳh se lamhe nahīñ toḌā karte

ahl-e-zamāna tum bhī baḌe vaqt par mile
kuchh baar ho chalī thiiñ mirī shādmāniyāñ

kahne-sunñe se vo taklīf-e-ayādat na kareñ
īsī-e-vaqt haiñ aa kar bhī pashemāñ hoñge

ajab hai merā mohsin bhī ki jaate vaqt vo akasr
mirī palkoñ pe ik raushan sitāra chhoḌ jaatā hai

vaqt-e-sahar hai aur chaman meñ shabnam chamke aise
jaise kirnoñ ke dhāgoñ meñ motī hoñ anmol

har ek lamha thā apne hī aks se dhundlā
guzarte vaqt ko ham aa.ina dikhāte kyā

ik shaḳhs jo mujh se vaqt le kar
aaj aa na sakā to ḳhush huā huuñ

tarāshtī rahī mauj-e-havā-e-vaqt hameñ
chaTān the magar āb-e-ravāñ ke saath rahe

kanīz-e-vaqt ko nīlām kar diyā sab ne
ye vahm kyā hai baḌā kaam kar diyā sab ne