Tags-Waqt

us ke kyā kyā sulūk dekhe haiñ
vaqt hī baḳht kā sikandar hai

maslahat mujh ko bhī malhūz hai ai ham-suḳhano
par mire pesh-e-nazar vaqt kī raftār bhī hai

bas-ki guzishtanī hai vaqt bas-ki shikastanī hai dil
ḳhvāb koī dikhā ki jo yaad na aa sake mujhe

vaqt har zaḳhm kā marham hai pa lāzim to nahīñ
zaḳhm jo us ne diyā hai kabhī bhar jā.egā

vaqt bhī ham se gilā kartā rahā
vaqt se ham bhī gilā karte rahe

Thiik chaurāhe pe maiñ jā baiThā
jab tirā vaqt-e-safar yaad aayā

unheñ maiñ vaqt ke kāñdhe pe Daal detā huuñ
jo bojh uThte nahīñ mere dast o baazū se

ḳhushī se yā ba-majbūrī qafas se āshiyāñ badlā
magar us vaqt jab saarā nizām-e-gulsitāñ badlā

aaTh pahar hai ye hī ġham
kaam bahut hai vaqt hai kam

galī meñ gūñjī ḳhamoshī kī chīḳh raat ke vaqt
tumhārī yaad kā bachcha sā Dar gayā mujh meñ

vidā-e-yār kā lamha Thahar gayā mujh meñ
maiñ ḳhud to zinda rahā vaqt mar gayā mujh meñ

kis par poshīda aur kis pe ayaañ honā thā
kaun huuñ maiñ mujh ko is vaqt kahāñ honā thā

maiñ to kahtā huuñ yahīñ ġhaar meñ rah lo jab tak
vaqt pūchho hī nahīñ shahr basātā phire kaun

kyā pighaltā jo rag-o-pai meñ thā yaḳh-basta lahū
vaqt ke jaam meñ thā shola-e-tar hī kitnā

gardisheñ vaqt se kahtā hai koī jā ke 'kiran'
ek lamha bhī nahīñ paas Thaharne vaalā

us ek qasr ko andar se jhāñkne kī talab
mirī nazar ne baḌā saḳht vaqt kaaTā thā

muddatoñ ghaav kiye jis ke badan par ham ne
vaqt aayā to usī ḳhvāb ko talvār kiyā

tanhā safar meñ raat ke is pichhle vaqt meñ
āvāz koī de to kidhar jaanā chāhiye

ḳhud-baḳhud hal ho ga.e kitne savāl
vaqt ke ḳhāmosh afsāne ke saath

mujhe to is darja vaqt-e-ruḳhsat sukūñ kī talqīn kar rahe ho
magar kuchh apne liye bhī sochā maiñ yaad aayā to kyā karoge