Tags-Waqt

mālūm nahīñ kis vaqt ye kyā bartāv kisī se kartī hai
duniyā se koī ummīd na rakh māyūs na ho duniyā hī to hai

ye vaqt bhī batātā hai ādāb-e-vaqt bhī
is TūTte sitāre ko jab dekhtā huuñ maiñ

ik faqat vasl kā na vaqt huā
dil huā roz roz raat huī

vaqt aayā to ḳhuun se apne dāġh-e-nadāmat dho leñge
sāya-e-zulf meñ jāgne vaale sāya-e-dār meñ so leñge

apne ġham se kaho har vaqt mire saath rahe
ek ehsān karo is ko musalsal kar do

maiñ ne auroñ se sunā hai ki nasīm aatī hai
kyuuñ mujhe vaqt-e-sahar us ne jagāyā na kabhī

taa.at kā vaqt guzrā mastī meñ aab raz kī
ab chashm-dāsht us ke yaañ hai faqat karam se

hālat-e-'bedār' ab kyā kījiye aap aage bayāñ
vaqt hai ab bhī agar tashrīf farmāte ho tum

ab aa gayā lafzoñ ke zavāl kā vaqt
bahut shorīda-sar

reg-e-sāhil pe likhī vaqt kī tahrīr huuñ maiñ
mauj aa.e to chalī jā.egī dho kar mujh ko

vaqt kā ḳhūn-e-rā.egāñ huuñ magar
ḳhushk lamhoñ meñ rach rahā huuñ maiñ

mudda.ā ham apnā kāġhaz par raqam kar jā.eñge
vaqt ke hāthoñ meñ apnā faislā rah jā.egā

koī shaam ke vaqt aa.egā lekin
sahar se ham āñkheñ bichhā.e hue haiñ

sarshār haiñ vaqt ke kaTore
jām-e-mai-e-nāb aa rahā hai

maiñ kisī ke yahāñ vaqt kyā kāTtā
apnā hī ghar 'shafaq' DhūñDhtā rah gayā

sūraj ko zarā kuchh Dhalne do kuchh vaqt kā dariyā bahne do
jo dhuup abhī tak sar par hai vo paañv talak aa jā.egī

vaqt kī dhaar meñ bah gayā sab magar
naam dīvār par ik likhā rah gayā

chhoḌ de mutrib bas ab lillāh pīchhā chhoḌ de
kaam kā ye vaqt hai kuchh kaam karne de mujhe

hazāroñ tūfāñ uThā.e haiñ vaqt aane par
lahū bhī ḳhaas adā se mire badan meñ rahā

achchhe-ḳhāse logoñ par bhī vaqt ik aisā aa jaatā hai
aur kisī par hañste hañste ḳhud par ronā aa jaatā hai